گوگل نیوز پر ہمیں فالو کریںکلائمیٹ ڈیٹا پروسیسنگ سینٹر نے پاکستان میں شعبان کا چاند دیکھنے سے متعلق پیشگوئی کی ہے۔
کلائمیٹ ڈیٹا پروسیسنگ سینٹر کے مطابق شعبان کے چاند کی پیدائش 29 جنوری کو شام 5 بج کر 36 منٹ پر ہوگی اور چاند ممکنہ طور پر 30 جنوری جمعرات کو نظر آئے گا۔
اگر 30 جنوری کو چاند نظر آتا ہے تو یکم شعبان 31 جنوری کو ہوگا اور شب برات 14 فروری کو منائی جائے گی۔
چاند دیکھنے کے دوران بعض علاقوں میں آسمان صاف ہوگا جبکہ کچھ علاقوں میں بادل چھائے رہنے کی توقع ہے۔
ڈیٹا سینٹر نے کہا کہ سورج غروب ہونے کے وقت چاند کی عمر 25 گھنٹے اور 4 منٹ ہوگی اور سورج غروب ہونے کے بعد چاند دیکھنے کا دورانیہ تقریباً 57 منٹ ہوگا۔
یہ بات قابل ذکر ہے کہ چاند کے نظر آنے کے لیے اس کی کم از کم عمر 19 گھنٹے ہونی چاہیے۔
یہ بھی یاد رہے کہ دنیا بھر کے مسلمان شعبان کی 15ویں رات کو شب برات مناتے ہیں۔شب برات اسلامی کیلنڈر کے آٹھویں مہینے شعبان کی 15ویں رات کو منائی جاتی ہے۔
شب برات کی مناسبت سے مسلمان عبادات میں مصروف ہوتے ہیں، جن میں نماز پڑھنا، صدقہ دینا اور روزہ رکھنا شامل ہے۔ مسلمان اپنے پیاروں کی قبروں پر جا کر ان کے لیے دعائے مغفرت بھی کرتے ہیں اور ان کی یاد کو تازہ کرتے ہیں۔
