ملک میں سردی کے ڈیرے، کراچی میں آج یخ بستہ ہوائیں

محکمہ موسمیات نے ملک میں آئندہ 24 گھنٹوں کے دوران خشک اور ٹھنڈے موسم کی پیش گوئی کی ہے جبکہ کراچی میں آج تیز ہوائیں چلنے کی توقع ہے۔

شمال مشرق سے چلنے والی ہواؤں کی رفتار 15 کلومیٹر فی گھنٹہ تک پہنچ سکتی ہے۔ شہر کا درجہ حرارت 14.5 ڈگری سینٹی گریڈ ریکارڈ کیا گیا ہے جبکہ ہوا میں نمی کا تناسب 54 فیصد ہے۔

کراچی میں تقریباً ایک ہفتے سے وقفے وقفے سے تیز ہواؤں کا سلسلہ جاری ہے جس نے شہر میں ٹھنڈک کا احساس بڑھا دیا ہے تاہم ان ہواؤں کے باوجود موسم دن بھر پرسکون اور خشک رہنے کی توقع ہے اور درجہ حرارت نسبتاً کم رہے گا۔

دوسری جانب ملک کے دیگر حصوں میں سخت سردی کی لہر نے کئی علاقوں کو اپنی لپیٹ میں لے رکھا ہے، پی ایم ڈی نے آئندہ چند دنوں میں سردی کی شدت میں اضافے کی پیش گوئی کی ہے جبکہ 18 جنوری سے 20 جنوری تک کئی علاقوں میں بارش اور برفباری کا امکان ظاہر کیا ہے۔

مغربی موسمی نظام کے زیر اثر کوئٹہ، زیارت، چمن، بارکھان، قلات اور خضدار سمیت اسلام آباد اور راولپنڈی کے علاقوں، اٹک، جہلم اور چکوال میں موسلا دھار بارش ہونے کی توقع ہے۔

مری، گلیات، گلگت بلتستان اور کشمیر کے پہاڑی علاقوں میں شدید برفباری کا امکان ہے، جو ایک خوبصورت مگر سخت سرد موسم کی منظر کشی کرے گا۔

کراچی میں 11 دن سے لاپتہ 7 سالہ صارم کی لاش زیرزمین ٹینک سے مل گئی

بلوچستان میں بھی شدید بارشوں کی پیش گوئی کی گئی ہے اور کچھ علاقوں میں ممکنہ سیلاب کے خدشے کے پیش نظر احتیاطی تدابیر اپنانے کی ہدایت دی گئی ہے۔ یہ موسمی نظام ان علاقوں میں روزمرہ زندگی کو متاثر کر سکتا ہے اور حکام نے شہریوں کو چوکس رہنے کی ہدایت دی ہے۔

پنجاب میں کئی علاقوں کو گہری دھند نے اپنی لپیٹ میں لے لیا ہے، جس کے باعث حد نگاہ شدید متاثر ہوئی ہے۔ سمندری سے ڈیرہ خانہ اور گوجرہ سے ملتان تک موٹروے کو بند کر دیا گیا ہے۔ موٹروے پولیس نے مسافروں سے غیر ضروری سفر سے گریز کرنے کی اپیل کی ہے، کیونکہ دھند کے باعث سفر خطرناک ہو سکتا ہے۔

مجموعی طور پر، ملک کے مختلف علاقوں میں سردی، تیز ہواؤں اور دھند کی ملی جلی صورتحال ہے جبکہ سردی کی لہر پورے پاکستان کے موسم پر اثر انداز ہو رہی ہے۔ حکام موسم کی صورتحال پر نظر رکھے ہوئے ہیں اور عوام کو بارش، برفباری اور کم حد نگاہ والے علاقوں میں احتیاطی تدابیر اختیار کرنے کی ہدایت کر رہے ہیں۔