گوگل نیوز پر ہمیں فالو کریںکراچی: سندھ کے صوبائی دارالحکومت کراچی میں پولیس نے مختلف علاقوں میں کارروائیاں کرتے ہوئے 6 ملزمان کو گرفتار کرلیا، جن سے اسلحہ اور لوٹا ہوا سامان برآمد کرکے مقدمات درج کرلیے گئے۔
گزشتہ روز درمیانی شب کراچی کے علاقوں کلفٹن بوٹ بیسن، گلشن اقبال اور اورنگی ٹاؤن میں مبینہ پولیس مقابلے ہوئے ہیں جن میں 5 زخمی ڈاکوؤں سمیت 6 ملزمان کو گرفتار کرکے ان کے قبضے سے اسلحہ اور لوٹا ہوا سامان برآمد کیا گیا ہے۔
اورنگی ٹاؤن سیکٹر 10 جنت البقیع قبرستان کے قریب مبینہ پولیس مقابلہ ہوا۔ پولیس کے مطابق اس مقابلے میں فائرنگ کے تبادلے کے بعد 3 ڈاکوؤں کو زخمی حالت میں گرفتار کیا گیا، جنہیں عباسی شہید اسپتال منتقل کردیا گیا ہے۔
اے این ایف کی مختلف شہروں میں کارروائیاں، بھاری مقدار میں آئس اور ہیروئن برآمد
دوسرا مبینہ پولیس مقابلہ گلشن اقبال بلاک 13 ڈی گیلانی اسٹیشن کے قریب ہوا۔ پولیس کے مطابق اس مقابلے میں فائرنگ کے تبادلے کے بعد 2 ڈاکو زخمی حالت میں گرفتار کیے گئے ہیں۔ جن کے قبضے سے 2 ٹی ٹی پستول، 3 موبائل فون، نقدی اور موٹر سائیکل برآمد کی گئی ہے۔
اسی طرح کلفٹن بوٹ بیسن کے بلاک فائیو میں گندا نالا کے قریب ایک اور مبینہ پولیس مقابلہ ہوا جس میں فائرنگ کے تبادلے کے بعد ایک ملزم کو گرفتار کرلیا گیا جب کہ دو فرار ہونے میں کامیاب ہوگئے۔
کلفٹن پولیس کا اس حوالے سے کہنا ہے کہ گرفتار ملزم اسٹریٹ کرمنل ہے، جس کے قبضے سے 2 پستول، شہریوں سے چھینے گئے 5 موبائل فون برآمد کیے گئے ہیں۔
پولیس کے مطابق یہ ملزمان شہریوں سے لوٹ مار کے بعد فرار ہورہے تھے، فرار ہونے والے دیگر دو ملزمان کی گرفتاری کے لیے کوششیں جاری ہیں۔
