پاکستان میں سیلاب کے بعد بیماریوں سے مزید اموات کا خدشہ ہے۔عالمی ادارۂ صحت

جنیوا: عالمی ادارۂ صحت کا کہنا ہے کہ پاکستان میں سیلاب کے بعد سیلابی پانی سے پھوٹ پڑنے والی وبائی بیماریوں سے مزید اموات کا خدشہ ہے۔

تفصیلات کے مطابق عالمی ادارۂ صحت (ڈبلیو ایچ او) کے سربراہ ڈاکٹر ادھانوم ٹیڈروس نے اپنے ایک بیان میں کہا کہ سیلاب کے بعد پاکستان میں بیماریوں اور اموات کا خدشہ ہے۔ سیلاب کے بعد پاکستان میں دوسری تباہی کے امکانات کے متعلق تشویش ہے۔

یہ بھی پڑھیں:

پاکستان میں اینٹی بایوٹکس کے بے دریغ استعمال پر عالمی ادارۂ صحت کو تشویش

سربراہ عالمی ادارۂ صحت نے ملک میں سیلاب سے تباہی پر افسوس کا اظہار کرتے ہوئے کہا کہ پاکستان کو سیلاب کے بعد بیماریوں سے اموات کی صورت میں نئی آفت کا سامنا ہے۔ اقوامِ متحدہ پاکستان کیلئے امداد کی نئی اپیل جاری کرے گا۔

ڈبلیو ایچ او کے سربراہ نے کہا کہ ہم عالمی برادری سے پاکستان میں سیلاب کے بعد وبائی امراض سے زندگیاں بچانے کیلئے دل کھول کر امداد کی گزارش کرتے ہیں۔ موسمیاتی تبدیلیوں کے نتیجے میں سیلاب نے پاکستان میں صحت کا نظام متاثر کیا ہے۔

عالمی ادارۂ صحت کا کہنا ہے کہ پاکستان میں لاکھوں افراد کی زندگیاں خطرے میں ہیں۔ سیلاب زدگان کے غیر محفوظ پانی پینے سے ہیضے سمیت دیگر وبائی امراض پھیل سکتے ہیں جبکہ ملک میں صحت کے مراکز سیلاب میں ڈوب چکے ہیں۔