سندھ حکومت کا ڈینگی ملیریا کے ٹیسٹ کی قیمتوں میں 50 فیصد کمی کا اعلان

ملک بھر میں سیلاب کی تباہ کاریوں کے ساتھ چاروں صوبوں میں سیلابی پانی کے باعث مچھر کے کاٹنے سے ہونے والی بیماریوں خاص طور پر ڈینگی بخار کے مثبت کیسز میں خاطر خواہ اضافہ دیکھا گیا ہے۔  

ڈینگی اور ملیریا کے بڑھتے کیسز کے پیشِ نظر سندھ ہیلتھ کیئر کمیشن نے نوٹیفکیشن جاری کیا ہے، جاری نوٹیفکیشن کے مطابق  ڈینگی اور ملیریا کے  لیبارٹری ٹیسٹ کی قیمت میں تقریباً 50 فیصد کمی کردی گئی ہے۔

50 فیصد کمی کے بعد صوبے میں ڈینگی کی تشخیص کے ٹیسٹ کی قیمت 1460 سے 3000 سے کم کرکے 850 کردی گئی ہے۔

ہیلتھ کیئر کمیشن نے پلیٹلیٹس کی تعداد جاننے کے ٹیسٹ کی قیمت 430 اور 550 سے کم کرکے 250 روپے کر دی گئی ہے جبکہ ملیریا کی تشخیص کے ٹیسٹ کی قیمت 800 اور 1300 سے کم کرکے 500 روپے کر دی ہے۔ 

جاری اعلامیے میں واضح کیا ہے کہ ڈینگی اور ملیریا کے ٹیسٹ کی قیمتوں میں کمی کا اطلاق فوری طور پر ہوگا، جبکہ ٹیسٹ کی قیمتوں میں کمی 15 دسمبر تک یعنی تین ماہ کے لیے کی گئی ہے۔