برطانوی فرمانروا کا پارلیمنٹ سے پہلا خطاب، آئین کے قیمتی اصولوں کو برقرار رکھنے کا عہد

لندن: برطانوی فرماں روا کنگ چارلس سوم نے پارلیمنٹ سے اپنے پہلے خطاب میں آئین کے قیمتی اصولوں کو برقرار رکھنے کا عہد کرتے ہوئے ملکۂ الزبتھ دوم کی قائم کردہ مثالوں کی پیروی کا اعلان کیا ہے۔

تفصیلات کے مطابق برطانیہ میں تاج و تخت کی وراثت کیلئے طویل ترین انتظار کرنے والے برطانوی بادشاہ کنگ چارلس نے پارلیمنٹ سے پہلی بار خطاب کرتے ہوئے کہا کہ میں ملکۂ الزبتھ کے آئینی حکومت سے وابستگی کے اصولوں پر عمل پیرا رہوں گا۔

یہ بھی پڑھیں:

ہم نے 6000 مربع کلومیٹر علاقے کا کنٹرول دوبارہ حاصل کرلیا۔یوکرین

پارلیمنٹ سے خطاب کے دوران کنگ چارلس نے کہا کہ پارلیمنٹ ملک کی بقاء اور جمہوریت کی زندگی کیلئے ذریعے کا کام کرتی ہے۔ تقریر کے بعد پارلیمنٹ میں حاضر وزراء نے بادشاہ کی سلامتی کیلئے دعا پر مشتمل ترانا بھی ملی جوش و جذبے سے گایا۔

تاحال ملکۂ الزبتھ دوم کی آخری رسومات جاری ہیں، تابوت کو فضائی راستے سے برطانوی دارالحکومت لندن پہنچا دیا جائے گا۔ ایڈنبرا میں سینٹ جائلز کیتھیڈرل میں تابوت رکھ کر دعائیہ تقریب کا انعقاد بھی کیا گیا۔

واضح رہے کہ برطانیہ پر طویل ترین عرصے تک حکمرانی کرنے والی ملکۂ برطانیہ الزبتھ دوم کے انتقال کے بعد لندن سمیت برطانیہ کے دیگر شہروں میں فضا سوگوار ہے۔ کنگ چارلس نے بہن بھائیوں کے ہمراہ تابوت لے جانے والے جلوس کی قیادت بھی کی۔

ملکۂ برطانیہ الزبتھ دوم کی آخری رسوم 19 ستمبر کو ادا کی جائیں گی۔ پاکستان سمیت درجنوں ممالک کے صدور اور وزرائے اعظم نے آنجہانی ملکۂ الزبتھ دوم کے انتقال پر تعزیت جبکہ کنگ چارلس کیلئے نیک خواہشات کا اظہار کیا ہے۔