کراچی میں سیریل کلرز بے لگام، سپاری لیکر ٹارگٹ کلنگ کا انکشاف، ایک ملزم گرفتار

کراچی میں سیریل کلرز بے لگام ہوگئے، پولیس کا کہنا ہے کہ سپاری لےکر شہریوں کی ٹارگٹ کلنگ کی جارہی ہے۔ ایک ملزم جاوید لنگڑا کو گرفتار کر لیا، مزید کی تلاش کر رہے ہیں۔

تفصیلات کے مطابق ملزم جاوید لنگڑا کو ڈسٹرکٹ سنٹرل پولیس نے گرفتار کیا۔ ایس ایس پی سنٹرل معروف عثمان نے پریس کانفرنس کے دوران کہا کہ کراچی میں معاوضہ لے کر ٹارگٹ کلنگ کی جاتی ہے۔ جاوید لنگڑا کو سی سی ٹی وی فوٹیج اور تکنیکی ذرائع سے گرفتار کیا۔

یہ بھی پڑھیں:

اے این ایف کی ایئرپورٹ پر کارروائی، بھاری مالیت کی منشیات برآمد

پریس کانفرنس کے دوران ایس ایس پی سنٹرل نے کہا کہ ٹارگٹ کلرز کے منظم گروہ نے 3 افراد کو سپاری لینے کے بعد ہدف بنا کر قتل کیا۔ رضویہ میں جب ہم ایک قاتل تک پہنچے تو مزید 2 افراد کے قتل کے سراغ ہاتھ لگ گئے۔ ٹارگٹ کلرز نے بڑے انکشافات کرڈالے۔ 

ایس ایس پی سنٹرل معروف عثمان نے کہا کہ ملزمان نے تفتیش کے دوران انکشاف کیا کہ ٹارگٹ کلرز گروہ کی صورت میں ارشد عرف ماموں کیلئے کام کرتے ہیں۔ ملزمان نے 4 جون کو ابراہیم شیخ کو کراچی کے علاقے رضویہ میں ارشد ماموں کے ہمراہ 3 ساتھیوں کی مدد سے قتل کیا۔

معروف عثمان نے کہا کہ ارشد ماموں نے ابراہیم شیخ کیلئے سپاری لی جس کے بعد ٹارگٹ کلنگ ہوئی۔ ملزمان نے اس سے قبل 2 افراد کو قتل کیا تھا۔ سب سے پہلے جمشید عالم کو بہادر عرف فیصل اور جاوید لنگڑا نے پریڈی الیکٹرانک مارکیٹ میں قتل کیا۔

بہادر عرف فیصل گرفتار ہوا تو جمشید عالم کے ڈرائیور نے گواہی دے کر ملزم کو شناخت کر لیا۔ بہادر نے جیل میں بیٹھ کر ہی گواہی دینے والے ڈرائیور کا قتل کروا دیا۔ مرتضیٰ نامی ڈرائیور کراچی کے علاقے بفر زون میں ٹارگٹ کلنگ کا نشانہ بنا۔

ڈرائیور کے قتل میں ارشد ماموں اور بہادر عرف فیصل کالا منصوبہ ساز تھے۔ ایس ایس پی سنٹرل کا کہنا ہے کہ ملزمان نے ہر قتل کے بدلے میں سپاری کی قیمت وصول کی۔ ارشد عرف ماموں کی گرفتاری سے پتہ چلے گا کہ ہدف بنا کر قتل کرنے پیچھے ملزمان کے کیا مقاصد تھے۔