کراچی میں ایم کیو ایم کے سابق مرکز نائن زیرو میں آتشزدگی

شہرِ قائد میں متحدہ قومی موومنٹ (پاکستان) کے سابق مرکز نائن زیرو میں آگ لگ گئی۔ مرکز نائن زیرو کو طویل عرصے تک ایم کیو ایم کی سیاسی سرگرمیوں کیلئے پارٹی سیکرٹریٹ کا درجہ حاصل رہا۔

تفصیلات کے مطابق ایم کیو ایم کے سابق مرکز نائن زیرو پر لگنے والی آگ سے بڑے پیمانے پر نقصان ہوا تاہم کسی شخص کے زخمی یا جاں بحق ہونے کی اطلاع سامنے نہیں آئی۔ واقعے کی اطلاع ملنے پر پولیس اور ریسکیو اہلکار جائے وقوعہ پر پہنچ گئے۔

یہ بھی پڑھیں:

نائن زیرو کے دفاتر گرانے کیلئے بھاری مشینری عزیز آباد میں داخل

 نائن زیرو کو متحدہ کے بانی اور سابق رہنما الطاف حسین کے دور میں مرکزی حیثیت حاصل رہی۔ حکام کا کہنا ہے کہ نائن زیرو پر لگنے والی آگ پر قابو پالیا گیا ہے۔ تاحال آگ لگنے کی وجوہات سامنے نہیں آسکیں۔ 

خیال رہے کہ اس سے قبل شہر قائد کے علاقے عزیز آباد میں ایم کیو ایم کے مرکزی دفتر نائن زیرو کے اردگرد موجود تمام دفاتر کو مسمار کرنے کے لیے بھاری مشینری علاقے میں داخل ہوگئی تھی۔

نجی ٹی وی کا گزشتہ برس دسمبر میں کہنا تھا کہ نائن زیرو کے اطراف میں موجود دفاتر کو مسمار کرنے کے لیے ہیوی لوڈرز اور مشینری داخل ہوگئی ہے جب کہ اس موقع پر پولیس، رینجرز اور دیگر قانون نافذ کرنے والے اداروں کی بھاری نفری بھی موجود تھی۔