ایشیا کپ سپر فور مرحلہ، پاکستان آج افغانستان کے مدمقابل آئے گا

دبئی: ایشیا کپ سپر فور مرحلے میں پاکستان ٹیم کا دوسرا میچ آج شارجہ میں افغانستان سے ہوگا۔

تفصیلات کے مطابق ایشیا کپ سپر فور مرحلے میں پاکستان ٹیم کا دوسرا میچ آج شارجہ میں افغانستان سے ہوگا، ٹاپ آرڈر میں محمد رضوان تسلسل کے ساتھ پرفارم کررہے ہیں، اُن کی فٹنس کے حوالے سے کچھ شکوک تھے، ٹیسٹ بھی کروائے گئے مگر پی سی بی کے مطابق وہ میچ کیلئے دستیاب ہیں۔

قومی کرکٹ ٹیم کے وکٹ کیپر محمد رضوان نے گزشتہ روز پریکٹس سیشن میں شرکت سے گریز کرتے ہوئے آرام کیا، ساتھی اوپنر بابر اعظم ابھی تک کوئی بڑی اننگز نہیں کھیل پائے ہیں، آؤٹ آف فارم کپتان پر توقعات کا بوجھ بڑھ گیا ہے جبکہ تیسری پوزیشن پر موجود فخرزمان کو بھی بڑی اننگز کھیلنا ہوگی۔

یہ بھی پڑھیں:

ایشیا کپ سپر فور مرحلہ، سری لنکا نے بھارت کو شکست دیدی

مڈل آرڈر میں خوشدل شاہ، آصف علی، افتخار احمد اور بھارت کو ناکوں چبوانے والے محمد نواز موجود ہیں، شاہنواز دھانی کی فٹنس میں بہتری آگئی مگر محمد حسنین کی جگہ ان کو شامل کرنے کا فیصلہ سوچ سمجھ کر کیا جائے گا، نسیم شاہ بھارت سے میچ میں پٹائی برداشت کرنے کے بعد کم بیک کے ارادے باندھ رہے ہیں۔

کپتان بابر اعظم نے دبئی میں میڈیا سے گفتگو کرتے ہوئے کہا کہ بھارت کے خلاف میچ کا دباؤ ہوتا ہے، ہم نے اس کو کم کیا ہے، پاور پلے میں زیادہ رنز بنے مگر بولنگ یونٹ نے اچھا کم بیک کیا، فخر زمان اور محمد رضوان کریز پر تھے تو حریف ٹیم کو تھوڑی پریشانی تھی، اسی لیے لیفٹ رائٹ کمبی نیشن آزمانے کا فیصلہ کیا۔

انہوں نے کہا کہ بھارت کے خلاف فتح سے ٹیم کا مورال بلند ہوا، ہمارا پلان ہے کہ جس مومینٹم میں چل رہے ہیں اسی کو اگلے میچز میں برقرار رکھیں، خوشی کی بات ہے کہ ایشیا کپ میں بولرز اور بیٹرز میں سے کوئی نہ کوئی ٹیم کی ضرورت کے مطابق پرفارم کررہا ہے، مختلف مین آف دی میچ سامنے آرہے ہیں۔

بابراعظم کا کہنا تھا کہ ہر کپتان چاہتا ہے کہ ٹرافی اٹھائے مگر یہ صرف کہنے سے ممکن نہیں ہوتا، کوشش اور محنت کرتے ہوئے میچز جیتنا پڑتے ہیں، کھلاڑی کارکردگی دکھارہے ہیں، ہم فتح کی پوری کوشش کریں گے، نتائج اللہ کے ہاتھ میں ہیں۔

خیال رہے کہ افغانستان ٹیم سپر فور مرحلے میں اپنا پہلا میچ سری لنکا کے خلاف ہار گئی تھی۔