پاکستان میں سیلاب کا بالی ووڈ سے کیا تعلق؟ شمعون عباسی کی مہوش حیات پر تنقید

ملک کے مشہورومعروف اداکار شمعون عباسی نے مہوش حیات سمیت پاکستانی شوبز شخصیات پر تنقید کرتے ہوئے کہا ہے کہ پاکستان میں سیلاب کا بالی ووڈ سے کیا تعلق ہے؟ ہم بھارتی فنکاروں کو اپنے معاملات سے الگ کیوں نہیں رکھتے؟

حال ہی میں مہوش حیات سمیت دیگر شخصیات نے پاکستان میں سیلاب سے ہونے والے بڑے پیمانے پر جانی و مالی نقصان پر بالی ووڈ شخصیات کی خاموشی کو موضوعِ بحث بنایا۔ مہوش حیات نے کہا کہ مصیبت کی کوئی قومیت، نسل یا مذہب نہیں ہوتا۔

یہ بھی پڑھیں:

کیا مہیش بھٹ مسلمان ہوچکے ہیں؟ کنگنا نے نیا پنڈورا بکس کھول دیا

اپنے حالیہ بیان میں مہوش حیات کا کہنا تھا کہ بھارتی اداکاروں کیلئے موقع ہے کہ وہ قوم پرستی سے آگے نکل کر اپنے مداحوں کا خیال کریں جبکہ اس وقت پاکستان کیلئے ایک دو الفاظ بولنا غلط نہیں ہوگا۔

سماجی رابطے کی ویب سائٹ ٹوئٹر پر اپنے پیغام میں اداکار شمعون عباسی نے کہا مجھے سمجھ میں نہیں آتا پاکستانی شوبز شخصیات اور شوبز کے پیج کیوں چاہتے ہیں کہ بھارتی اداکار پاکستان میں سیلاب کی تباہ کاریوں پر بات کریں۔

I don't understand why Pakistani celebrities and entertainment pages want Bollywood actors to talk about our devastating situation regarding the floods In Pakistan
Why does it matter so much what is this obsession about Bollywood that we can't leave them alone and focus on pak.

— Shamoon Abbasi (@shamoonAbbasi) September 4, 2022

اداکار شمعون عباسی نے کہا کہ یہ بات اتنی اہم کیوں بن گئی ہے اور کیا ہم اتنے بالی ووڈ زدہ ہو گئے ہیں کہ بھارتی اداکاروں کو الگ رکھتے ہوئے پاکستان پر اپنے طور پر توجہ مرکوز نہیں کرسکتے؟  

خیال رہے کہ پاکستان میں سیلاب کے باعث 13 ہزار سے زائد افراد جاں بحق جبکہ ہزاروں زخمی ہوئے۔ ملک بھر میں سیلاب سے کروڑوں افراد متاثر ہوئے ہیں تاہم بالی ووڈ کی کسی شخصیت نے پاکستان میں سیلاب سے تباہ کاری پر کوئی بیان جاری نہیں کیا۔

تجزیہ کاروں کا کہنا ہے کہ بالی ووڈ شخصیات خوب سمجھتی ہیں کہ نریندر مودی کے دور میں پاکستان کے سیلاب زدہ علاقوں میں بسنے والے اپنے مداحوں سے ہمدردی کا اظہار انہیں مہنگا بھی پڑ سکتا ہے۔