پرسنل اسسٹنٹ نے بھارتی اداکارہ کے قتل کا اعتراف کرلیا

بھارتی اداکارہ سونالی فوگاٹ کے مبینہ قتل کے کیس میں گرفتار پرسنل اسسٹنٹ سدھیر سنگوان نے اعتراف جرم کر لیا ہے۔

گوا پولیس نے جمعہ کو بی جے پی لیڈر اور ٹک ٹاک اسٹار کے قتل کیس کے سلسلے میں سونالی فوگاٹ کے ذاتی معاون سدھیر سنگوان کو سکھویندر سنگھ کے ساتھ گرفتار کیا تھا۔

انسپکٹر جنرل آف پولیس اوم ویر سنگھ بشنوئی نے جمعہ کو ایک پریس کانفرنس کرتے ہوئے بتایا کہ سنگوان نے جرم کا اعتراف کر لیا ہے۔

پولیس افسر نے بتایا کہ گوا پہنچنے کے بعد وہ سکھویندر کے ساتھ سونالی فوگاٹ کو پارٹی کرنے کے بہانے شمالی گوا میں کرلی کے ریسٹورنٹ لے گیا اور سنگوان نے پینے کے پانی میں کوئی ناگوار چیز ملا دی اور سونالی کو اسے پینے پر مجبور کیا۔

انہوں نے کہا کہ پانی پینے کے بعد وہ ریستوران میں بے چین اور بیمار محسوس کرنے لگیں جس کے بعد انہیں سنگوان اور سکھویندر ہوٹل لے گئے جہاں وہ ٹھہرے ہوئے تھے اور پھرسونالی کو اسپتال لے کرگئے جہاں اسے مردہ قرار دیا گیا۔

#WATCH | Sonali Phogat death: Goa IGP says,”…Video establishes that one of the accused forcefully made her consume a substance. When confronted, accused Sukhwinder Singh & Sudhir Sangwan confessed they intentionally mixed obnoxious chemical into a liquid & made her drink it…” pic.twitter.com/85aPyjuGy4

— ANI (@ANI) August 26, 2022

پولیس نے بتایا کہ سونالی پھوگٹ کے بھائی رنکو ڈھاکہ نے شکایت میں الزام لگایا تھا کہ سونالی کو اس کے ذاتی معاون سدھیر سنگوان نے سکھویندر سنگھ کے ساتھ مل کر اس کی جائیدادوں اور مالی اثاثوں پر قبضہ کرنے اور اس کا سیاسی کیریئر ختم کرنے کے ارادے سے قتل کیا تھا۔

پولیس افسر نے کہا کہ تفتیشی افسر نے متعلقہ احاطے کے سی سی ٹی وی فوٹیج کی جانچ کی تو پتہ چلا کہ سدھیر زبردستی سونالی کو کچھ پلا رہا تھا۔

انہوں نے مزید بتایا کہ سدھیر سنگوان کو سکھویندر سنگھ دونوں پولیس کی حراست میں ہیں ۔

واضح رہے کہ اداکارہ سونالی فوگاٹ کو 22 اگست کو گوا کے ایک اسپتال منتقل کیا گیا تھا جہاں ڈاکٹرز نے انہیں مردہ قرار دیا تھا۔

بعدازں سونالی فوگاٹ کی پوسٹ مارٹم رپورٹ میں تشدد اور زخم کے متعدد نشانات کی تصدیق ہوئی تھی لیکن پوسٹ مارٹم رپورٹ میں موت کی صحیح وجہ کا ذکر نہیں کیا گیا تھا۔

پوسٹ مارٹم رپورٹ آنے کے بعد ان کے بھائی کی درخواست پرمقدمہ درج کرکے سونالی کے پرسنل اسسٹنٹ سدھیر ساگوان اور انکے دوست سکھویندر واسی کوگرفتار کر لیا گیا۔

بھارتی میڈیا کا کہنا ہے کہ سونالی فوگاٹ کی شہرت ایک متنازع شخصیت کی تھی۔ انہوں نے ٹک ٹاک سے شہرت حاصل کی اور ریئلٹی شو بگ باس کا بھی حصہ رہیں۔