گیس کی کمی، کراچی میں سی این جی اسٹیشن تین روز کیلئے بند

کراچی: شہر قائد میں گیس کی قلت کے باعث سی این جی اسٹیشن پھرتین روز کیلئے بند کردیے گئے ہیں۔

سوئی سدرن گیس کمپنی (ایس ایس جی سی) کے مطابق کراچی میں کل سے 22 اگست تک سی این جی بند رہےگی۔

واضح رہے کہ کراچی کے مختلف علاقوں میں گیس کا شدید بحران ہے اور بارشوں کے باعث گیس کی لائنیں بھی ٹوٹنے کی اطلاعات ہیں جس سے اولڈ سٹی ایریا کے رہائشی علاقوں میں گیس کی سپلائی شدید متاثر ہے۔

 دوسری جانب کراچی میں گزشتہ شب سے بارش کا سلسلہ وقفے وقفے سے جاری ہے۔ ملیر ندی بپھر گئی، پانی گھروں میں داخل ہوگیا، پھنس جانے والے شہریوں کو ریسکیو کیا جارہا ہے۔

یہ بھی پڑھیں:

کراچی میں بارشوں سے گیس کی لائنیں متاثر، گیس کی فراہمی بند 

کراچی کے مختلف علاقوں میں بارش کا سلسلہ جاری ہے۔ صدر، زینب مارکیٹ، کورنگی، اولڈ سٹی ایریا اور آئی آئی چندریگر روڈ میں بارش کے باعث جگہ جگہ پانی کھڑا ہوگیا۔

ملیر ندی میں طغیانی کے باعث رات گئے سیلابی پانی گھروں میں داخل ہوگیا۔ محکمۂ موسمیات کا کہنا ہے کہ آج کراچی میں موسلا دھار بارش ہوگی جس سے اربن فلڈنگ کا خدشہ ہے۔

متعدد افراد ملیر ندی سے نکلنے والے سیلابی پانی میں پھنس کر رہ گئے۔ اطلاع ملنے پر شہری انتظامیہ نے ریسکیو کارروائی کا آغاز کیا۔ ملیر میمن گوٹھ میں 2 افراد کو ریسکیو کر لیا گیا ہے۔