فائرنگ سے زخمی ہوکر ہسپتال منتقل ہونیوالے سابق جاپانی وزیر اعظم ہلاک

 ٹوکیو: جاپان کے سابق وزیراعظم شنزوابے پر قاتلانہ حملہ ہوا جس کے نتیجے میں شدید زخمی ہونے کے بعد ہسپتال میں علاج کے دوران انتقال کر گئے ہیں۔

بین الاقوامی میڈیا کے مطابق سابق جاپانی وزیراعظم کو مغربی شہر نارا میں انتخابی مہم کی تقریر کے دوران گولی ماری گئی، جس کے نتیجے میں وہ شدید زخمی ہوگئے، جنہیں فوری طبی امداد کیلئے اسپتال منتقل کیا، جہاں انہیں دل کا دورہ پڑگیا۔

میڈیا رپورٹ کے مطابق سیکیورٹی فورسز کی جانب سے شنزو ابے پر حملے کے فوری بعد ایک مشکوک شخص کو حراست میں بھی لیا گیا ہے۔

دوسری جانب جاپان کی حکومت کا مؤقف ہے کہ افسوسناک واقعے کی تفتیش کیلئے ٹاسک فورس تشکیل دی جاچکی ہے جبکہ اعلیٰ حکام جلد میڈیا کو سابق وزیراعظم کے متعلق بریفنگ دیں گے۔

معلوم رہے کہ جاپان کے سب سے طویل عرصے تک وزیراعظم رہنے والے شنزو ابے 2006 میں پہلی مرتبہ ایک سال کیلئے جبکہ 2012 سے 2020 کے طویل دورانیے تک دوبارہ وزیراعظم منتخب ہوئے تاہم ناسازی صحت کے باعث وہ عہدے سے مستعفیٰ ہوگئے۔

تاحال سابق وزیر اعظم کو گولی مار کر قتل کرنے والے شخص کے متعلق مزید معلومات سامنے نہیں آسکیں۔ سابق وزیر اعظم شنزوابے کے انتقال پر عالمی برادری کے متعدد رہنماؤں نے افسوس کا اظہار کیاہے۔