کوئٹہ آفت زدہ، بلوچستان میں بارش اور سیلابی ریلے، اموات 39ہوگئیں

بلوچستان کے صوبائی دارالحکومت کوئٹہ کو آفت زدہ قرار دے دیا گیا جبکہ صوبے میں بارش اور سیلابی ریلوں کے باعث مختلف حادثات کے دوران اموات کی تعداد 39 ہوگئی ہے۔

تفصیلات کے مطابق بلوچستان میں آج مسلسل تیسرے روز بھی بارش کا سلسلہ جاری ہے۔ سیلابی ریلوں اور طوفانی بارش سے 250 کے قریب گھر متاثر ہوئے ہیں۔ ژوب میں ولہ ڈیم ٹوٹ گیا۔ مقامی آبادی ڈیم سے بہہ نکلنے والے پانی میں گھر گئی۔

یہ بھی پڑھیں:

کے الیکٹرک کی لاپرواہی ، کرنٹ لگنے سے 4 سالہ بچی جاں بحق

رکنی میں مسلسل پانی جمع ہونے کے باعث ڈیم بھر گیا جس کے بعد پانی نیشنل ہائی وے پرآگیا۔ خضدار اور کوہلو کے ندی نالوں میں بھی بارش کے باعث طغیانی ہے۔ نال میں رابطہ سڑک پانی میں بہہ گئی۔ صوبے میں سیلابی ریلوں سے متعدد علاقے متاثر ہوئے۔ 

گزشتہ روز سے لے کر اب تک کوئٹہ سمیت مختلف شہروں میں سیلابی ریلے گھروں میں داخل ہو گئے۔ درجنوں مکانات کی چھتیں اور دیواریں گرنے کے واقعات میں 39 افراد جاں بحق جبکہ متعدد زخمی ہو گئے۔ ریسکیو کی کارروائیاں بھی جاری ہیں۔

صوبائی ڈیزاسٹرمینجمنٹ اتھارٹی کا گزشتہ روز کہنا تھا کہ شدید بارش کے باعث سب سے زیادہ ہرنائی، پشین، ژوب اور قلعہ سیف اللہ کے علاقے متاثر ہوئے۔ خشنوب، قمر الدین اور مسلم باغ میں سیلابی صورتحال کے باعث بڑے پیمانے پر نقصان ہوا۔

متعدد دیہات میں رات کے وقت سیلابی ریلے داخل ہو گئے جبکہ خشنوب کا رابطہ پل سیلابی ریلے میں بہہ گیا۔ ریسکیو اہلکار متاثرین تک پہنچنے میں مشکلات کا شکار رہے۔ مسلم باغ سول ہسپتال بارش کے پانی سے بھر گیا۔