گزشتہ حکومت نے معیشت برباد کی، پاکستان مل کر بچائیں گے۔مفتاح اسماعیل

اسلام آباد: وفاقی وزیرِ خزانہ مفتاح اسماعیل نے کہا ہے کہ گزشتہ حکومت نے معیشت کو برباد کیا، پاکستان کو ڈیفالٹ سے مل کر بچائیں گے۔ سب کو مل کر حصہ ڈالنا ہوگا۔

تفصیلات کے مطابق بجٹ پر بحث کیلئے قومی اسمبلی اجلاس میں اظہارِ خیال کے دوران وزیرِ خزانہ مفتاح اسماعیل نے کہا کہ ملک کو ڈیفالٹ سے بچانے کی قیمت ادا کرنا ہوگی۔ میں نے امریکا سے پی ایچ ڈی کی ڈگری 30 سال قبل حاصل کی۔

یہ بھی پڑھیں:

حکومت کی معاشی پالیسیاں پاکستان کا دیوالیہ کررہی ہیں، فواد چوہدری

وفاقی وزیرِخزانہ نے کہا کہ میں نے عالمی مالیاتی فنڈ (آئی ایم ایف) میں بھی ملازمت کی۔ پاکستان کو اتنے خستہ حال میں دیکھنے کا اتفاق نہیں ہوا۔ پیپلز پارٹی کی حکومت میں کرنٹ اکاؤنٹ خسارہ 8.1 فیصد تھا۔

وزیرِ خزانہ مفتاح اسماعیل نے کہا کہ 2013 میں ہماری حکومت اقتدار میں آئی تو خسارہ اور ملکی ذخائر دونوں کم تھے۔ عمران خان حکومت نے ایک پیسے کی ایل این جی خریدنا گوارا نہیں کیا۔ پیٹرول کے طویل معاہدے کیے گئے۔

مفتاح اسماعیل نے کہا کہ تحریکِ انصاف کی نااہلی کی وجہ سے آج پاکستان برے حالات کا سامنا کر رہا ہے۔ پی ٹی آئی دورِ حکومت میں 4 بجٹ آئے جو بد ترین خسارے کے بجٹ تھے۔ نواز شریف سمیت گزشتہ حکومتوں نے عمران خان جتنا قرض نہیں لیا۔

ان کا کہنا تھا کہ عمران خان کی آمدن 15 کروڑ سے کم ہونے کے باعث وہ سپر ٹیکس کی زد میں نہیں آئیں گے۔ حکومت نے امیر لوگوں اور صنعتوں پر ٹیکس عائد کیا۔ رواں مالی سال کا بجٹ خسارہ 5 ہزار 300 ارب ہوگا۔