افغانستان، زلزلے سے اموات کے بعد طالبان نے بین الاقوامی مدد کی اپیل کردی

افغانستان میں زلزلے سے اموات کا سلسلہ رک نہ سکا، طالبان نے بین الاقوامی مدد کی اپیل کردی۔

برطانوی میڈیا کے مطابق افغانستان میں زلزلے سے 1000 افراد ہلاک اور 1500 زخمی ہوگئے ہیں۔

برطانوی میڈیا نے بتایا کہ زلزلے سے کئی گھروں کی چھتیں گر گئیں، متاثرہ علاقوں میں کئی گاؤں تباہ ہوگئے، سڑکیں بھی بند ہیں جس سے متاثرہ علاقوں تک پہنچنا مشکل ہورہا ہے۔

وفاقی وزیر اطلاعات مریم اورنگزیب کا کہنا ہے کہ وزیراعظم شہباز شریف کی ہدایت  پر افغانستان میں زلزلہ متاثرین کے لیے سامان بھجوا دیا گیا ہے جس میں کمبل، خوراک، خیمے اور دیگر اشیائے ضروریہ شامل ہیں۔

واضح رہے افغانستان میں 6.1 شدت کا زلزلہ خوست سے تقریباً 44 کلومیٹر کے فاصلے پر 51 کلو میٹر کی گہرائی میں آیا تھا۔