مقصود چپڑاسی کی پراسرار موت، پی ٹی آئی نے تحقیقات کا مطالبہ کردیا

پاکستان تحریک انصاف نے منی لانڈرنگ کیس کے اہم کردار مقصود چپڑاسی کی اچانک موت کی وجہ جاننے کیلئے تحقیقات کا مطالبہ کردیا۔

تفصیلات کے مطابق وفاقی تحقیقاتی ادارے کے وزیراعظم شہباز شریف اور حمزہ شہباز کیخلاف 16 ارب روپے کی منی لانڈرنگ کیس میں نامزد مرکزی ملزم مقصود چپڑاسی دبئی میں پراسرار حالات میں انتقال کرگئے، جس نے کئی قسم کے سوالات کو جنم دے دیا ہے۔

حزب اختلاف پاکستان تحریک انصاف (پی ٹی آئی) نے شدید احتجاج کرتے ہوئے مقصود چپڑاسی اور کیس کے تفتیشی افسر ڈاکٹر محمد رضوان کے انتقال کی اصل وجہ جاننے کے لیے آزادانہ تحقیقات کا مطالبہ کیا ہے۔

یہ بھی پڑھیں: بجٹ تجاویز پر غور کیلئے وزیر اعظم کی زیر صدارت وفاقی کابینہ اجلاس آج ہوگا

ایک رپورٹ کے مطابق یو اے ای کی وزارتِ صحت کی جانب سے مقصود چپڑاسی کی موت کا جو سرٹیفکیٹ جاری کیا گیا ہے، اُس میں اُن کی اچانک موت کا ذکر نہیں کیا گیا ہے جبکہ میڈیا رپورٹس کا کہنا ہے کہ مقصود چپڑاسی کی موت حرکتِ قلب بند ہونے کی وجہ سے ہوئی ہے۔

49 سالہ ملک مقصود احمد، جو پی ٹی آئی کے رہنماؤں کی وجہ سے ’مقصود چپڑاسی‘ کے نام سے مشہور ہوگئے تھے، پی ٹی آئی کے رہنماؤں نے شریف خاندان کی مبینہ بدعنوانی پر تنقید کرنے کے لیے ان کے نام کا مسلسل ذکر کیا تھا۔

واضح رہے کہ مقصود چپڑاسی وزیر اعظم کے خلاف منی لانڈرنگ کیس میں شریک ملزم اور اشتہاری مجرم تھے، اس کا خاندان، وہ مبینہ طور پر پی ٹی آئی کے اقتدار میں آنے سے عین قبل 2018 میں متحدہ عرب امارات چلا گیا تھا۔

علاوہ ازیں سابق وزیراعظم عمران اکثر اپنی تقاریر میں مقصود چپڑاسی کا حوالہ دیتے ہوئے اُن پر الزام عائد کرتے تھےکہ شہباز شریف اور اُن کے بیٹوں نے مقصود چپڑاسی کے بینک اکاؤنٹ سے اربوں روپے کی منی لانڈرنگ کی۔

دوسری جانب ایف آئی اے کے خصوصی پراسیکیوٹر فاروق باجوہ کے مطابق مقصود کی موت سے منی لانڈرنگ کیس پر کوئی اثر نہیں پڑے گا۔

فاروق باجوہ کا کہنا تھا کہ ’مقصود ایک مشتبہ شخص تھا گواہ نہیں، اس طرح اس کی موت کیس پر کوئی اثر نہیں پڑے گا‘

اپوزیشن پی ٹی آئی نے مقصود اور ایف آئی اے کے تفتیش کار ڈاکٹر رضوان کی موت کی وجہ جاننے کے لیے آزادانہ تحقیقات کا مطالبہ کیا ہے۔