خطرہ ہے یاسین ملک کو زیرِ حراست قتل کردیا جائے گا، وزیرِ خارجہ

 اسلام آباد: وزیرِ خارجہ بلاول بھٹو زرداری نے حریت رہنما یاسین ملک کو من گھڑت الزامات کی بنیاد پر سزا سنانے پر ردعمل دیتے ہوئے کہا کہ خطرہ ہے کہ انھیں زیرِ حراست قتل کردیا جائے گا۔

تفصیلات کے مطابق وزیرِ خارجہ بلاول بھٹو زرداری نے حریت رہنما یاسین ملک کی سزا پر اقوامِ متحدہ سیکریٹری جنرل کو خط لکھ دیا، جس میں انہوں نے سیکریٹری جنرل کو مقبوضہ کشمیر پر بھارتی غیرقانونی غاصبانہ قبضے، اور وہاں کی تشویشناک صورتحال سے آگاہ کیا۔

وزیرِ خارجہ بلاول بھٹو زرداری نے کہا کہ بھارتی عدالت نے من گھڑت، جھوٹے الزامات پر دائر مقدمے میں یاسین ملک کو سزا سنائی، حریت رہنما یاسین ملک کے ساتھ بیماری کے باوجود جیل میں بے رحمانہ سلوک کیا گیا۔

انہوں نے کہا کہ حریت رہنما یاسین ملک کی قید، من گھڑت الزامات پر مقدمہ، بدنیتی پر مبنی سزا بھارتی عزائم کی عکاس ہے، بھارت کی کوشش ہے کشمیریوں کی جائز جدوجہد آزادی کو دہشتگردی کے طور پر پیش کیا جائے، بھارت نے اپنی بین الاقوامی قانونی ذمہ داریوں کو مکمل نظر انداز کیا۔

یہ بھی پڑھیں: مسلح افواج اہم ریاستی ادارہ اور قوم کا فخر ہے، شہباز شریف 

وزیرِ خارجہ کی جانب سے لکھے گئے خط میں کہا گیا ہے کہ یاسین ملک کے ساتھ سلوک، کشمیریوں، کشمیری قیادت کو مقدمات میں پھنسانے کی کوششوں کا حصہ ہے، خطرہ ہے یاسین ملک کو زیرِ حراست قتل کردیا جائے۔

وزیرِ خارجہ نے خط میں سیکرٹری جنرل پر زور دیا کہ وہ اقوام متحدہ قراردادوں کے مطابق تنازع کشمیر کا پُرامن حل کرائیں، سیکرٹری جنرل بھارت کی مقامی کشمیری قیادت کو نشانہ بنانے کا فوری نوٹس لیں، یاسین ملک کے خلاف تمام بے بنیاد الزامات واپس لینے کے لیے بھارت پر دباؤ بڑھایا جائے۔

بلاول بھٹو زرداری نے خط میں مزید لکھا کہ یاسین ملک کو بھارتی قید سے فی الفور رہا کیا جائے، بے بنیاد، من گھڑت، جھوٹے الزامات میں قید تمام کشمیری رہنماؤں کو رہا کیا جائے، بھارت، اقوام متحدہ سلامتی کونسل قراردادوں کے مطابق حق خودارادیت دے۔

اُن کا کہنا تھا کہ بھارت مقبوضہ خطے میں انسانی حقوق کی سنگین پامالیاں بند کرے، بھارت مقبوضہ کشمیر میں کالے قوانین کو منسوخ کرے، اقوام متحدہ کی زیر نگرانی تحقیقات کے لیے آزاد محققین کو رسائی دے۔