عمران خان کی گرفتاری کا خواب دیکھنے والے حکومت کی فکر کریں۔پرویز الٰہی

لاہور: ق لیگ کے مرکزی رہنما و اسپیکر پنجاب اسمبلی چوہدری پرویز الٰہی نے کہا ہے کہ عمران خان کی گرفتاری کا خواب دیکھنے والے حکومت کی فکر کریں۔ آزادی لانگ مارچ کی تیاریاں کی جارہی ہیں۔

تفصیلات کے مطابق اسپیکر پنجاب اسمبلی نے میڈیا سے گفتگو کرتے ہوئے کہا کہ مہنگائی بم کی دوسری قسط جون میں آجائے گی۔ خواب دیکھنے پر پابندی نہیں تاہم عمران خان کی گرفتاری کاخواب دیکھنے والے اپنی حکومت کی فکر کریں۔

یہ بھی پڑھیں:

مبینہ آڈیو لیک، عمران خان کی منافقت بے نقاب ہوگئی۔وزیراعظم

گفتگو کے دوران چوہدری پرویز الٰہی نے کہا کہ حکومت سابق وزیر اعظم عمران خان سے خوفزدہ ہے۔ جعلی حکمران لانگ مارچ روکنے کیلئے ہر غیر قانونی ہتھکنڈہ آزما رہے ہیں۔ عوام کا ایک ہی سوال ہے کہ اگر حکومت نہیں سنبھالی جاتی تو آنے کی کیا ضرورت تھی؟

ق لیگی رہنما چوہدری پرویز الٰہی نے کہا کہ عوام کے ساتھ ساتھ آئی ایم ایف بھی عارضی حکومت پر اعتماد کرتا نظر نہیں آتا۔ حکومت مہنگائی بم کی دوسری قسط جون میں سامنے لائے گی۔ عمران خان روس کے ساتھ 30 فیصد سستے تیل کا معاہدہ کرچکے تھے۔ 

روس سے تیل کی خریداری کے متعلق چوہدری پرویز الٰہی نے کہا کہ اگر معاہدے پر عمل کیا جاتا تو آج ڈالر آسمان سے باتیں نہ کرتا۔ مہنگائی کے باعث ملکی معیشت تباہی کے دہانے پر پہنچ چکی ہے۔ حکومت کی معاشی پالیسیاں ناکام ہوچکی ہیں۔