وزیراعظم سعودی عرب کے تین روزہ دورے پر مدینہ منورہ پہنچ گئے

اسلام آباد: وزیر اعظم شہباز شریف سعودی عرب کے تین روزہ سرکاری دورے پر مدینہ منورہ پہنچ گئے۔

مدینہ کے گورنر شہزادہ فیصل بن سلمان اور اعلیٰ سطحی سعودی حکام نے ان کا پرتپاک استقبال کیا۔ وفاقی وزراء بلاول بھٹو زرداری، مفتاح اسماعیل، شاہ زین بگٹی، مریم اورنگزیب، خواجہ آصف، چوہدری سالک حسین اور ایم این ایز ڈاکٹر خالد مقبول صدیقی اور محسن داوڑ وزیراعظم کے ہمراہ ہیں۔

وزیر اعظم پاکستان شہباز شریف نے مدینہ کے گورنر فیصل بن عبدالعزیز سے ملاقات کی جس میں پاک سعودی برادرانہ تعلقات پر تبادلہ خیال کیا گیا۔ فریقین نے دونوں ممالک کے درمیان دوطرفہ تعلقات کو مزید مضبوط بنانے پر اتفاق کیا۔

رواں ماہ کے اوائل میں عہدہ سنبھالنے کے بعد وزیراعظم کا یہ پہلا بیرون ملک کا دورہ ہے۔ وزیراعظم روضہ رسول (ص) پر حاضری دیں گے۔ پھر مکہ مکرمہ میں عمرہ بھی کریں گے۔

دورے کے دوران وزیراعظم سعودی قیادت کے ساتھ دوطرفہ بات چیت کریں گے، خاص طور پر اقتصادی، تجارتی اور سرمایہ کاری کے تعلقات کو آگے بڑھانے اور سعودی عرب میں پاکستانی افرادی قوت کے لیے زیادہ مواقع پیدا کرنے پر توجہ مرکوز کریں گے۔ دونوں فریقین باہمی دلچسپی کے متعدد علاقائی اور بین الاقوامی امور پر بھی تبادلہ خیال کریں گے۔

دورے سے قبل وزیر اعظم شہباز شریف نے کہا کہ پاکستان اور سعودی عرب گہرے اور پائیدار برادرانہ تعلقات کے پابند ہیں جو باہمی اعتماد اور باہمی تعاون کی ٹھوس بنیادوں پر استوار ہیں۔

اپنے ویڈیو پیغام میں وزیراعظم نے کہا کہ پاکستانی عوام حرمین شریفین کے متولی کو انتہائی عزت کی نگاہ سے دیکھتے ہیں۔ انہوں نے کہا کہ مشکل کی گھڑی میں پاکستان کی مسلسل حمایت پر سعودی عرب کے تہہ دل سے مشکور ہیں۔

مزید پڑھیں:عمران خان نے حکومتی ہتھکنڈوں کو قابلِ مذمت اور شرمناک قرار دے دیا

شہباز شریف نے کہا کہ ولی عہد شہزادہ محمد بن سلمان کی بصیرت والی سعودی قیادت نے سعودی عرب کے برادر عوام کے لیے زیادہ سے زیادہ ترقی اور خوشحالی کے لیے جانفشانی سے کام کیا ہے۔