صدر مملکت ڈاکٹر عارف علوی نے 4 نئے وفاقی وزراء سے حلف لے لیا

اسلام آباد:صدر مملکت ڈاکٹر عارف علوی نے شہبازشریف کی کابینہ کا حصہ بننے والے 4 نئے وفاقی وزراء سے حلف لے لیا۔

صدر مملکت عارف علوی نے ایوان صدر میں ایک تقریب میں تین نئے وفاقی وزرا اور ایک وزیر مملکت سے حلف لیا۔حلف اٹھانے والے تین وفاقی وزراء میں مسلم لیگ (ق) کے چوہدری سالک حسین، مسلم لیگ (ن) کے جاوید لطیف اور بلوچستان نیشنل پارٹی مینگل کے آغا حسن بلوچ شامل ہیں۔

حلف برداری کی تقریب میں وزیراعظم شہباز شریف نے بھی شرکت کی۔صدر عارف علوی نے بی این پی مینگل کے محمد ہاشم نوتزئی سے وزیر مملکت کے عہدے کا حلف بھی لیا۔

اس سے قبل صدر مملکت نے وزیر اعظم شہباز شریف اور ان کی کابینہ کے ارکان سے حلف لینے سے معذرت کر لی تھی۔عارف علوی کی جگہ چیئرمین سینیٹ صادق سنجرانی نے آئینی فریضہ سرانجام دیا۔

مزید پڑھیں:وزیر اعظم شہباز شریف نے قومی سلامتی کونسل کا اجلاس آج طلب کر لیا

یاد رہے کہ 19اپریل کو 34 رکنی کابینہ نے حلف اٹھایا تھا،پاکستان مسلم لیگ (ن )کو 13 وزارتیں ملی ہیں اور پاکستان پیپلز پارٹی کو 9وزارتیں دی گئی ہیں۔ چار وزارتیں جمعیت علمائے اسلام اور متحدہ قومی موومنٹ پاکستان کو دو وزارتیں سونپی گئیں۔

بلوچستان عوامی پارٹی ، پاکستان مسلم لیگ (ق)اور جمہوری وطن پارٹی سمیت دیگر اتحادی جماعتوں کو نئے سیٹ اپ میں ایک ایک وزارت ملی۔

دو وزیر مملکت کا تعلق مسلم لیگ (ن (اور ایک وزیر مملکت کا تعلق پیپلز پارٹی سے ہے۔ پیپلز پارٹی کے ایک اور مسلم لیگ ن کے دو ارکان کو وزیراعظم کا مشیر مقرر کیا گیا ۔