عمران خان نے وزیر اعظم کی کرسی کو کاروبار بنا لیا تھا۔ مریم اورنگزیب

اسلام آباد: وفاقی وزیرِ اطلاعات مریم اورنگزیب نے کہا ہے کہ عمران خان نے وزیر اعظم کی کرسی کو کاروبار بنا لیا تھا، موصوف کاروبار کرتے رہے، جتنا توشہ خانہ سے کمایا، اتنا پوری زندگی میں نہیں کمایا تھا۔

تفصیلات کے مطابق وزیرِ اطلاعات نے اسلام آباد میں پریس کانفرنس کے دوران کہاکہ عمران خان کو منی ٹریل دکھانا ہوگی، رسیدیں دینی پڑیں گی، تحفے بازاروں میں بیچے نہیں جاسکتے۔ پی ٹی آئی حکومت گزشتہ دسمبر میں 50 فیصد کا قانون متعارف کراچکی جبکہ عمران خان نے تحائف 20 فیصد پر حاصل کیے۔ وہ پاکستان کا تحفہ تھا، میرا تحفہ میری مرضی نہیں۔

یہ بھی پڑھیں:

پی آئی اے کی سڈنی کیلئے پہلی پرواز چند روز کیلئے مؤخر کر دی گئی

پریس کانفرنس کے دوران مریم اورنگزیب نے کہا کہ ساڑھے چار سال کے توشہ خانہ تحائف کی قیمت 14 کروڑ 20 لاکھ روپے بنتی ہے، عمران خان کی 2 ماہ کی  آمدنی 5 کروڑ 50 لاکھ اور 4 سال میں 14 کروڑ 20 لاکھ ہوئی۔ معیشت، خارجہ پالیسی اور ترقی منصوبے خراب حالت میں ہیں۔پی ٹی اے کو روبوٹکس ٹویٹس کے خلاف کارروائی کی ہدایت کی ہے۔ 

وزیرِ اطلاعات نے کہا کہ وزیر اعظم شہباز شریف نے 5 روز میں کام شروع کردیا۔ روبوٹکس ٹویٹس کے ذریعے منظم مہم چل رہی ہے۔ ٹویٹس ختم کریں گے۔ شناخت کا عمل شروع اور روبوٹک مشینوں کا پتہ چلا لیا گیا ہے۔ سابق خاتونِ اوّل بشریٰ بی بی نے ایف بی آر ٹیکس ریٹرن میں پرانا نام لکھوا رکھا ہے۔ عمران خان کے پاس عوام کیلئے جواب نہیں۔

وفاقی وزیر مریم اورنگزیب نے کہا کہ کوٹ لکھپت جیل میں شہبا زشریف کو نماز کیلئے کرسی میسر نہ تھی۔ مانیٹرنگ شہزاد اکبر کر رہے تھے۔ بڑے دل کے مالک شہباز شریف نے عمران خان کیلئے فول پروف سکیورٹی کے احکامات جاری کیے۔ شہزاد اکبر غیر ملکی شہریت رکھتے ہیں جو ملک چھوڑ کر بھاگ گئے۔ انہیں واپس لانے کا طریقہ جانتے ہیں۔

مریم اورنگزیب نے کہا کہ تحریکِ انصاف کا وزیر دوائیوں کو لوٹتا رہا۔ چینی پر ناجائز اخراجات ہوئے جس سے وہ مہنگی ہوگئی۔ اگر فرح کے خلاف ثبوت نہ ہوتے تو وہ ملک چھوڑ کر نہ بھاگتیں۔ پی ٹی آئی حکومت نے میڈیا پریس گیلری میں جیمرز لگا دئیے تھے۔ ملک میں پہلی بار تحریکِ عدم اعتماد لا کر جھوٹے وزیر اعظم کو ہٹایا گیا۔