سری لنکا نے پریانتھا قتل کیس کے فیصلے کو انصاف کی جیت قرار دے دیا

سری لنکن منیجر پریانتھا کمارا کے قتل پر عدالت نے فیصلہ سنا دیا۔ پاکستان میں سری لنکن ہائی کمشنر موہن وجے وکرما کا کہنا ہے کہ پریانتھا قتل کیس کا فیصلہ انصاف کی جیت ہے۔ پاکستان نے ہم سے انصاف کا وعدہ کیا تھا، وہ وفا کیا گیا ہے۔

تفصیلات کے مطابق چیئرمین پاکستان علماء کونسل حافظ طاہر اشرفی کی آج سری لنکن ہائی کمشنر موہن وجے وکرما سے ملاقات ہوئی۔ اس دوران پاک سری لنکا تعلقات، باہمی دلچسپی کے امور اور خطے کی صورتحال زیر غور آئی۔ اس موقعے پر گفتگو کرتے ہوئے سری لنکن ہائی کمشنر نے پاکستانی حکومت کے اقدامات کی تعریف کی۔

یہ بھی پڑھیں:

امریکا کاامن وخوشحالی کیلئے نئی پاکستانی حکومت کے ساتھ ملکرکام کرنے کا عزم

ملاقات کے دوران  سری لنکن ہائی کمشنر نے کہا کہ پاکستان نے ہم سے انصاف مہیا کرنے کا جو وعدہ کیا، وہ پورا ہوا۔ انہوں نے میڈیا سے بات چیت کرتے ہوئے کہا کہ علماء اور سیاستدانوں نے متعدد مرتبہ ہم سے ملاقاتیں کیں۔ ایک واقعے پر پاکستان سے دل برا نہیں کرنا چاہئے۔ پاک سری لنکا 71سالہ دوستی پر واقعہ اثر انداز نہیں ہوناچاہئے۔

چیئرمین پاکستان علماء کونسل حافظ طاہر اشرفی کا کہنا تھا کہ عدالت کے فیصلے نے قوم کو سرخرو کردیا۔ پوری قوم قتل کے خلاف عدالتی فیصلے پر متحد نظرآئی۔ ہم وحشت و دہشت کو پروان نہیں چڑھا سکتے۔ حکومتِ پاکستان اور قوم نے جو وعدہ کیا، وہ وفا ہوا ہے۔ انہوں نے پاک سری لنکا تعلقات کے حوالے سے بھی میڈیا سے گفتگو کی۔ 

پریانتھا کمارا کے ساتھ ظلم اور عدالتی فیصلہ

گزشتہ برس 3 دسمبر کے روز انسانیت خون کے آنسوؤں میں نہا گئی جب اسپورٹس گارمنٹس فیکٹری میں سری لنکن منیجر پریانتھا کمارا پر مذہبی پوسٹر اتارنے کا مبینہ طور پر جھوٹا الزام لگا کر حملہ کیا گیا۔ فیکٹری ورکرز بے گناہ پریانتھا کمارا کے پیچھے پڑ گئے جو جان بچانے کیلئے فیکٹری کی بالائی منزل کی طرف دوڑے تاہم ورکرز نے ان کا چھت پر جا کر گھیراؤ کر لیا۔

فیکٹری گارڈز بھی ورکرز کو نہ روک سکے جنہوں نے مل کر منیجر کو بالائی منزل سے نیچے پھینکا۔ اتنی بلندی سے نیچے گرنے کے بعد پریانتھا کمارا جان کی بازی ہار چکے تھے۔ ملزمان نے قتل پر رکنے کا نام نہیں لیا بلکہ لاش کی بھی بے حرمتی کی۔ میت کو گھسیٹ کر فیکٹری سے باہر چوک پر لے جایا گیا۔ لاتیں اور ڈنڈے مارے اور پھر نذرِ آتش کردیا۔

حال ہی میں انسدادِ دہشت گردی عدالت نے سری لنکن شہری کے ناحق قتل پر فیصلہ سنا دیا۔ 6 ملزمان کو 2 بار سزائے موت سنائی گئی جبکہ 9 مجرموں کو عمر قید، 72 مجرموں کو 2، 2 سال قید کی سزا سنائی گئی۔ ایک مجرم علی اصغر کو 5 سال قید جبکہ ایک اور ملزم بلال کو الزام ثابت نہ ہونے کے باعث بری کیا گیا۔ عدالتی فیصلے سے عالمی سطح پر ملک کا وقار بلند ہوا۔