سابق معاون خصوصی شہباز گل عمران خان کے چیف آف اسٹاف مقرر

اسلام آباد: سابق معاونِ خصوصی شہباز گل چیئرمین پی ٹی آئی کے چیف آف اسٹاف مقرر کردئیے گئے جو عمران خان کی رہائش گاہ بنی گالا میں اپنے فرائض سرانجام دیں گے۔

تفصیلات کے مطابق چیئرمین پی ٹی آئی عمران خان نے ڈاکٹر شہباز گل کی بطور چیف آف اسٹاف تقرری کی منظوری دی اور تقرری کا باضابطہ نوٹیفکیشن بھی جاری کیا گیا ہے۔ قبل ازیں یہ ذمہ داری پارٹی کے مرکزی رہنما نعیم الحق سرانجام دے رہے تھے۔

یہ بھی پڑھیں:

ایم کیو ایم کا شہباز حکومت کی وفاقی کابینہ میں شمولیت سے انکار

پی ٹی آئی رہنما نعیم الحق آج سے 2 سال قبل فروری 2020 میں انتقال کر گئے تھے جنہیں 16 فروری کو سپردِ خاک کیا گیا۔ کراچی کے نجی ہسپتال میں 15 فروری کو انتقال کر جانے والے نعیم الحق کی عمر 70 برس تھی جو کینسر کے مرض میں مبتلا تھے۔

کافی عرصے سے علیل ہونے کے باعث نعیم الحق کا علاج آغا خان ہسپتال کراچی میں کیا جارہا تھا۔ واضح رہے کہ فروری 2020 کے بعد سے چیف آف اسٹاف کا عہدہ کسی پارٹی رہنما کو نہیں دیا گیا۔ شہباز گل چیئرمین سیکرٹریٹ بنی گالہ سے فرائض انجام دیں گے۔

تحریکِ انصاف کے مرکزی رہنما اور معاونِ خصوصی نعیم الحق کے انتقال پر سابق وزیر اعظم عمران خان اور موجودہ صدرِ مملکت ڈاکٹر عارف علوی کے ساتھ ساتھ آرمی چیف جنرل قمر جاوید باجوہ نے بھی افسوس کا اظہار کیا تھا۔