ڈالر کی قیمت میں ساڑھے 4روپے کا اضافہ، نئی قیمت 192 روپے ہوگئی

اسلام آباد: پاکستان میں سیاسی بحران کے پیشِ نظر ڈالر کی قیمت میں اضافے کا سلسلہ جاری ہے، گزشتہ 24 گھنٹوں میں ڈالر کی قیمت میں 4روپے 50 پیسے کا اضافہ ہوا جس سے امریکی ڈالر کی نئی قیمت 192روپے تک جا پہنچی ہے۔

آج انٹر بینک میں ڈالر کو پر لگ گئے، کاروباری اوقات کےدوران ڈالر کی قیمت میں 3 روپے 75پیسے کا اضافہ ریکارڈ کیا گیا۔اوپن مارکیٹ میں ڈالر 4روپے 50 پیسے مہنگا ہوگیا۔انٹر بینک مارکیٹ میں پہلی بار ڈالر 189 روپے کا ہوگیا۔ 

یہ بھی پڑھیں:

پی ایس ڈی پی کا  6 منصوبوں کیلئے 6 ارب روپے کا مطالبہ 

اوپن کرنسی مارکیٹ میں ڈالر 192 روپے کی ریکارڈ سطح پر فروخت ہورہا ہے۔ اس سے قبل ڈالر کی قیمت میں 2.22 روپے کا اضافہ ریکارڈ کیا گیا تھا جس سے نئی قیمت 188 روپے 50 پیسے تک جاپہنچی تھی، تاہم ڈالر کی قیمت میں مزید اضافہ ریکارڈ کیا گیا۔ 

دوسری جانب پاکستان اسٹاک مارکیٹ میں بھی آج کاروباری ہفتے کے چوتھے روز کے ایس ای 100 انڈیکس میں 208 پوائنٹس کی مندی دیکھی گئی۔ انڈیکس 43 ہزار 903 پوائنٹس کی سطح پر آگیا جبکہ کاروبار میں تاحال مندی کا رجحان غالب ہے۔

رواں ماہ کے آغاز سے ڈالر کی قیمت میں 10 روپے سے زائد کا اضافہ نوٹ کیا گیا۔ روپے کی قدر میں 19 اعشاریہ 50 فیصد کمی دیکھی گئی ہے۔ معاشی ماہرین کا کہنا ہے کہ ڈالر کی قیمت بڑھنے میں ملک کی سیاسی صورتحال کا بھی ہاتھ ہے۔

گزشتہ روز سونے کی قیمت میں بھی اضافہ ہوا۔ صرافہ بازار جیولرز ایسوسی ایشن کا کہنا تھا کہ سونے کی فی تولہ قیمت میں 800 روپے کا اضافہ ریکارڈ کیا گیا ہے۔ سونے کی فی تولہ قیمت 1 لاکھ 32 ہزار 800 روپے ہوگئی۔