عثمان بزدار کی بشریٰ بی بی اور فرح خان پر الزامات کی مذمت

لاہور: سابق وزیر اعلیٰ پنجاب عثمان بزدار نے بدھ کے روز کہا کہ وہ وزیر اعظم عمران خان کی اہلیہ بشریٰ بی بی اور ان کی قریبی دوست فرح خان پر علیم خان، چوہدری سرور اور اپوزیشن کے دیگر ارکان کی جانب سے لگائے گئے الزامات کی سختی سے تردید کرتے ہیں اور ان کی مذمت کرتے ہیں کیونکہ ان الزامات میں کوئی صداقت نہیں ہے۔

سابق وزیر اعلیٰ پنجاب عثمان بزدار کا کہنا تھا کہ ان کے دور میں پنجاب میں سیاسی تبادلے صرف اور صرف ”میرٹ اور قواعد و ضوابط” کی بنیاد پر کیے گئے۔

بزدار نے دعویٰ کیا کہ منی لانڈرنگ اور کرپشن کے بے تاج بادشاہوں کو ہمیشہ اپنے حریفوں اور اداروں پر بے بنیاد الزامات لگانے کی عادت رہی ہے تاکہ وہ سیاسی میدان میں شکست کھانے پر انہیں بلیک میل کر سکیں۔

سابق وزیر اعلیٰ نے کہا کہ جن لوگوں کو سیاسی شکست کا سامنا کرنا پڑا ہے وہ ”مخالفین پر بے بنیاد اور من گھڑت الزامات لگا کر“ اپنی تذلیل نہیں چھپا سکتے۔

بزدار نے دعویٰ کیا کہ ”مسلم لیگ (ن) اور اس کے حواریوں نے ساڑھے تین سال میں میرے یا میری کابینہ کے خلاف کرپشن کا ایک بھی سکینڈل سامنے نہیں لاسکے۔

سابق وزیر اعلیٰ پنجاب نے کہا کہ ”اگر تمہارے پاس ثبوت ہے تو دکھاؤ۔ میں نے پنجاب میں ساڑھے تین سال ایمانداری سے کام کیا۔

سابق وزیر اعلیٰ نے کہا کہ اپوزیشن بغیر کسی ٹھوس ثبوت کے گھریلو خواتین پر الزامات نہیں لگا سکتی، چاہے وہ خاتون اول ہو یا فرح خان۔

مزید پڑھیں: عامر لیاقت کے وزیر اعظم پر سنگین الزامات، راجہ اظہر نے ایف آئی اے کو خط لکھ دیا

بزدار نے کہا کہ ان سب چیزوں کا مقصد صرف یہ ہے کہ عمران خان پر ہر طرح سے تنقید کی جائے، آپ ناکام ہوں گے کیونکہ عمران خان کی ایمانداری پر کوئی انگلی نہیں اٹھا سکتا۔