کابینہ ڈویژن کا سابق وزراء، معاونین کو سرکاری گاڑیاں فوراً واپس کرنیکا حکم

اسلام آباد: قومی اسمبلی کے ساتھ ساتھ وفاقی کابینہ بھی تحلیل ہوگئی، کابینہ ڈویژن نے سابق وزراء اور مشیروں کو سرکاری گاڑیاں فوری طور پر واپس کرنے کا حکم جاری کیا ہے۔ معاونینِ  خصوصی کو بھی یہی ہدایت کی گئی ہے۔

تفصیلات کے مطابق کیبنٹ ڈویژن نے تمام سابق وزراء، معاونینِ خصوصی اور مشیران کو تحریری احکامات جاری کردئیے۔ ہدایت کی گئی کہ تمام حکام اپنے زیرِ استعمال سرکاری گاڑیاں متعلقہ وزارتوں اور محکمہ جات کے حوالے کردیں۔

یہ بھی پڑھیں:

وزیر اعظم عمران خان نے لیٹر گیٹ کی جوڈیشل انکوائری کا مطالبہ کردیا

آج سے 3 روز قبل وزیر اعظم کی تجویز پر صدرِ مملکت ڈاکٹر عارف علوی نے قومی اسمبلی تحلیل کردی تھی جس کے بعد وفاقی کابینہ، مشیران اور معاونینِ خصوصی بھی اپنے اپنے عہدوں سے محروم ہو گئے تاہم سرکاری گاڑیوں کا استعمال تاحال جاری ہے۔

واضح رہے کہ عمران خان کوبھی بطور وزیرِ اعظم ڈی نوٹیفائی کردیا گیا تھا، تاہم صدرِ مملکت ڈاکٹر عارف علوی کی ہدایت کے مطابق عمران خان نگراں وزیر اعظم کی تعیناتی تک وزارتِ عظمیٰ کے فرائض سنبھالیں گے۔ نگراں وزیر اعظم کیلئے مشاورت جاری ہے۔

وزیر اعظم نے نگراں وزیر اعظم کیلئے سابق چیف جسٹس گلزار احمد کا نام تجویز کیا جبکہ اپوزیشن لیڈر قومی اسمبلی شہباز شریف کا کہنا ہے کہ ہم آئین شکنوں کے ساتھ بات نہیں کریں گے۔ انہوں نے تاحال نگراں وزیر اعظم کا نام تجویز نہیں کیا۔