حکومت کا بڑا فیصلہ، گورنر پنجاب چوہدری محمد سرور عہدے سے برطرف

لاہور / اسلام آباد: وفاقی حکومت نے گورنر پنجاب چوہدری محمد سرور کو عہدے سے برطرف کردیا ہے، تاحال کسی نئے گورنر کا نام سامنے نہیں آیا۔

سماجی رابطے کی ویب سائٹ ٹوئٹر پر اپنے پیغام میں وفاقی وزیرِ اطلاعات و قانون فواد چوہدری نے کہا کہ وفاقی حکومت نے گورنر پنجاب چوہدری محمد سرور کو ان کے عہدے سے برطرف کردیا ہے۔

یہ بھی پڑھیں:

قوم کو رمضان کی مبارکباد، وزیر اعظم کا اسمبلی اجلاس میں شرکت کا فیصلہ

ٹوئٹر پیغام میں وزیرِ اطلاعات و نشریات فواد چوہدری نے کہا کہ نئے گورنر پنجاب کا اعلان بعد میں کیا جائے گا۔ آئین کے مطابق ڈپٹی اسپیکر قائم مقام گورنر پنجاب ہوں گے۔ 

وفاقی حکومت نے گورنر پنجاب چوہدری محمد سرور کو ان کے عہدے سے برطرف کر دیا ہے، نئے گورنر پنجاب کا اعلان بعد میں کیا جائیگا، آئین کے مطابق ڈپٹی اسپیکر قائم مقام گورنر ہوں گے

— Ch Fawad Hussain (@fawadchaudhry) April 3, 2022

نجی ٹی وی نے دعویٰ کیا ہے کہ گورنر پنجاب چوہدری سرور کو علیم خان گروپ سے درِ پردہ رابطوں کی وجہ سے ہٹایا گیا۔ وزیر اعظم کو اطلاعات تھیں کہ چوہدری سرور علیم گروپ کو سپورٹ کر رہے ہیں۔

خیال رہے کہ گورنر پنجاب چوہدری محمد سرور نے اپنے عہدے کا حلف 5 ستمبر 2018ء کو اٹھایا تھا۔ ماضی میں چوہدری محمد سرور 2013 میں بھی گورنر پنجاب بنے تھے۔

گورنر پنجاب چوہدری محمد سرور نے 29 جنوری 2015ء کو اپنے عہدے سے استعفیٰ دے دیا۔ پریس کانفرنس کے دوران ان کا کہنا تھا کہ میں وہ پہلا پاکستانی اور مسلمان ہون جو برطانوی رکنِ پارلیمنٹ بنا۔

جنوری 2015ء کی پریس کانفرنس کے دوران چوہدری سرور نے مزید کہا کہ میں نے قرآنِ پاک پر حلف اٹھانے والے پہلے برطانوی رکنِ پارلیمنٹ کا اعزاز بھی حاصل کیا ہے۔ کوئی سیاستدان جھوٹا کہلوانا نہیں چاہتا۔

چوہدری محمد سرور نے کہا کہ بدقسمتی سے پاکستان میں سچ کا قحط ہے۔ میرے دل میں ہمیشہ عوام کی ترقی و خوشحالی کیلئے کام کرنے کی آرزو رہی ہے۔ جھوٹا ثابت ہوجاؤں تو سزا کیلئے تیار ہوں۔