متحدہ نے بھی حکومت کا ساتھ چھوڑ دیا، فروغ نسیم اور امین الحق مستعفی

اسلام آباد: حلیف جماعت ایم کیو ایم (پاکستان) نے حکومت کا ساتھ چھوڑ دیا۔ وفاقی وزیرِ قانون فروغ نسیم اور وزیرِ انفارمیشن ٹیکنالوجی امین الحق نے استعفے دے دئیے، فروغ نسیم کا کہنا ہے کہ میرا استعفیٰ 1 بجے تک وزیر اعظم آفس پہنچ جائے گا۔

تفصیلات کے مطابق وفاقی وزیرِ قانون فروغ نسیم نے استعفیٰ دینے کا اعلان کرتے ہوئے کہا کہ میں اور امین الحق وفاقی وزارتوں سے مستعفی ہورہے ہیں۔

یہ بھی پڑھیں:

تحریکِ عدم اعتماد، ایم کیو ایم اور اپوزیشن کا معاہدہ، اعلان آج کیا جائے گا

وفاقی وزیرِ قانون فروغ نسیم نے کہا کہ آج شام 4 بجے پریس کانفرنس ہوگی۔ واضح رہے کہ متحدہ نے اپوزیشن کے ہمراہ مشترکہ پریس کانفرنس کا اعلان گزشتہ روز کیا تھا۔

خیال رہے کہ اس سے قبل تحریکِ عدم اعتماد پر حکمراں سیاسی جماعت پی ٹی آئی کی حلیف ایم کیو ایم (پاکستان) اور اپوزیشن کے مابین معاہدہ حتمی مراحل میں داخل ہوگیا جس کا اعلان آج کیا جائے گا۔

 متحدہ قومی موومنٹ (پاکستان) کا جھکاؤ اپوزیشن کی جانب سے تحریکِ عدم اعتماد پیش کیے جانے کے بعد سے ہی حزبِ اختلاف کی طرف نظر آتا ہے۔ اپوزیشن وفد نے گزشتہ روز پارلیمنٹ لاجز میں ایم کیو ایم قائدین سے اہم ملاقات کی۔

اپوزیشن وفد میں پی ڈی ایم کے سربراہ مولانا فضل الرحمان، سابق صدر آصف زرداری، چیئرمین پی پی پی بلاول بھٹو زرداری اور قائدِ حزبِ اختلاف قومی اسمبلی و صدر ن لیگ شہباز شریف شریک تھے۔ آج معاہدے کے متعلق ایم کیو ایم مشترکہ پریس کانفرنس کریگی۔