وزیر خارجہ شاہ محمود قریشی چین کے 3 روزہ دورے کیلئے روانہ

اسلام آباد: وزیرخارجہ شاہ محمود قریشی ہمسایہ ملک چین کے 3 روزہ دورے کیلئے روانہ ہو گئے ہیں جس کے دوران چین سمیت دیگر ممالک کے وزرائے خارجہ سے ملاقاتیں ہوں گی۔

تفصیلات کے مطابق چینی دارالحکومت بیجنگ میں بین الاقوامی ٹرائیکا پلس اجلاس ہو رہا ہے۔ وزیر خارجہ شاہ محمود قریشی چین کے دورے کے بعد روس کا بھی دورہ کرینگے۔ ماسکو میں بھی وزیر خارجہ کی متعدد عالمی رہنماؤں سے ملاقاتیں شیڈول ہیں۔

یہ بھی پڑھیں:

 استعفیٰ نہیں دیا، وہ میرے جانے کی دعائیں مانگ رہے ہونگے، مراد راس

ملک میں جاری موجودہ سیاسی بحران کے ساتھ ساتھ عالمی سطح پر روس یوکرین جنگ کے تناظر میں بھی وزیر خارجہ شاہ محمود قریشی کا دورہ خاصی اہمیت کا حامل ہے۔ مختلف ممالک کے حکام سے ملاقاتوں کے دوران دو طرفہ تعاون پر گفتگو ہوگی۔

بعض تجزیہ کاروں کا کہنا ہے کہ وزیر اعظم عمران خان کے خلاف اپوزیشن کی جانب سے پیش کی گئی تحریکِ عدم اعتماد کے تناظر میں وزیر خارجہ شاہ محمود قریشی کا دورہ اہم پیشرفت ہے۔ قبل ازیں وزیر اعظم نے عدم اعتماد کو عالمی سازش قرار دیا تھا۔

اپنے تین روزہ دورۂ چین کے دوران وزیر خارجہ شاہ محمود قریشی افغانستان سمیت خطے میں قیامِ امن کی کاوشوں سے چینی قیادت اور دیگر عالمی رہنماؤں کو آگہی دینگے اور چینی اسٹیٹ کونسلر اور چینی ہم منصب سے بھی ملاقات کریں گے۔ 

وزیر خارجہ روسی و ایرانی ہم منصب اور دیگر اعلیٰ حکام سے بھی ملاقاتیں کریں گے جن کے دوران کثیر الجہتی شعبہ جات میں دو طرفہ تعاون کے فروغ پر تبادلۂ خیال کیا جائے گا۔ دو طرفہ تعلقات کو فروغ دینے کیلئے اقدامات اٹھانے پر بات چیت ہوگی۔