گوگل نیوز پر ہمیں فالو کریںکامیڈی سے اداکاری کے میدان میں قدم رکھنے والے اداکار احمد علی بٹ نے وزارت مذہبی امور کی جانب سے رمضان ٹرانسمیشن کے دوران گیم شوز پر پابندی عائد کرنے کی تجویز کو تنقید کا نشانہ بنایا۔
اداکار نے انسٹاگرام پر ایک اسٹوری پوسٹ کرتے ہوئے گیم شوز کے بجائے ٹی وی پر جعلی خبروں اور مذہبی تضحیک پر پابندی لگانے پر زور دیا، جو کہ عوام کیلئے تفریح کا ذریعہ ہے۔
انہوں نے پوسٹ کیا کہ جعلی خبروں، پیڈ نیوز اینکرز، پروپیگینڈا، ٹی وی پر مذہب کا مذاق اڑانے والے، خوف اور جھوٹ پھیلانے والے پراگرامز پر پابندی لگانی چاہئے۔
احمد علی بٹ نے مزید کہا کہ ہم سب جانتے ہیں کہ رمضان میں گیم شوز پورے خاندان کی تفریح کا باعث ہوتے ہیں بعدازاں انہوں نے کہا کہ فہد مصطفیٰ جیسے لوگوں نے تفریح پاکستان کیلئے وقف کر رکھی ہے۔
اداکار کا کہنا تھا کہ ہم پاکستانیوں کو ایسے شوز پر فخر ہونا چاہئے اور اس کے بجائے اپنی توجہ اُن مسائل کی طرف کرنی چاہئے جس کا سامنا ہمارا ملک اس وقت کررہا ہے۔
خیال رہے کہ رواں ہفتے عوام کی شکایت پر وزارت مذہبی امور نے رمضان نشریات کے حوالے سے صدر اور وزیر اعظم کو متعدد تجاویز ارسال کر دی تھیں۔
وزیر مذہبی امور پیر نور الحق قادری نے اپنے جاری کردہ ایک بیان میں کہا تھا کہ معاشرے میں مذہبی و مسلکی ہم آہنگی کا فروغ رمضان نشریات کی اولین ترجیح ہونا چاہیئے۔
یہ بھی پڑھیں:آخرکیوں پاکستانی ستارے بزنس کلاس کی تصویریں پوسٹ کرتے ہیں؟ عدنان صدیقی سیخ پا
