جہانگیر ترین کی آئندہ ہفتے وطن واپسی کاامکان، وزیر اعلیٰ پنجاب کی تبدیلی سے پیچھے نہ ہٹنے پر اتفاق

لاہور:پی ٹی آئی کے ناراض رہنما جہانگیر ترین کی آئندہ ہفتے وطن واپسی کاامکان، علیم خان گروپ سے وزیر اعلیٰ پنجاب کی تبدیلی کے مطالبے سے پیچھے نہ ہٹنے کے موقف پر اتفاق ہوگیا۔

ذرائع کے مطابق جہانگیر ترین کی پاکستان واپسی آئندہ ہفتہ متوقع ہے جس کے بعد ترین گروپ کی جانب سے اپنا آئندہ کا لائحہ عمل تیار کیا جائے گا، ذرائع نے دعویٰ کیا کہ ترین گروپ کی آئندہ ہفتہ ہی ن لیگ کیساتھ ملاقات کا امکان ہے، ترین گروپ کی پرویز الٰہی سے بھی ملاقات ہوگی۔

مزید پڑھیں:تحریک عدم اعتماد میں ترین اور علیم خان گروپ کہیں دکھائی نہیں دیتا، شاہ محمود قریشی

ان اہم ملاقاتوں سے قبل ترین گروپ کا مشاورتی اجلاس ہوگا جس میں سیاسی ملاقاتوں پر تفصیلی مشاورت ہوگی۔قوی امکان ہے کہ مشاورتی اجلاس جہانگیر ترین کی وطن واپسی کے فوری بعد بلایا جائے گا۔

دوسری جانب جہانگیر ترین گروپ کے رہنماؤں نے لندن سے واپس آنے والے سینئر رہنما عبدالعلیم خان سے ان کی رہائشگاہ پر ملاقات کی جس میں موجودہ سیاسی صورتحال پر تفصیلی تبادلہ خیال کیا گیا، رہنماؤں نے وزیر اعلیٰ پنجاب کی تبدیلی کے مطالبے سے پیچھے نہ ہٹنے کے موقف پر اتفاق کیا۔