نور مقدم قتل کیس، ظاہر جعفر کے والدین سمیت 9ملزمان کی بریت چیلنج

 سابق سفیر کی بیٹی نور مقدم کے قتل کے کیس میں مرکزی ملزم ظاہر جعفر کے والدین سمیت 9 ملزمان کی بریت اسلام آباد ہائیکورٹ میں چیلنج کردی گئی ہے۔

تفصیلات کے مطابق مقتولہ نور مقدم کے والد شوکت مقدم نے ہائیکورٹ میں اپیل دائر کی ہے جس میں درخواست گزار کا کہنا ہے کہ ملزمان کے خلاف ڈیجیٹل شواہد اور ثبوت ہیں، ٹرائل کورٹ کا ملزمان کو بری کرنے کا فیصلہ قانون کے خلاف ہے۔

یہ بھی پڑھیں:

کراچی پولیس چیف کا فیصلہ، ذاتی سکیورٹی پر مامور اہلکاروں کی تھانہ طلبی

درخواست گزار شوکت مقدم نے عدالت سے استدعا کی ہے کہ بری کیے گئے ملزمان کو قانون کے مطابق سزا ملنی چاہئے۔ درخواست گزار کے وکیل شاہ خاور نے جمیل تھراپی ورکس کے سی ای او طاہر ظہور سمیت 6 ملزمان کی بریت کے خلاف اپیل دائر کردی۔

وکیل شاہ خاور نے خانساماں جمیل، چوکیدار افتخار اور مالی جان محمد کو نور مقدم قتل کیس میں دیگر دفعات کے تحت سزا دینے کیلئے بھی اپیل کی ہے۔ واضح رہے کہ ٹرائل کورٹ نے ظاہر جعفر کے والدین اور دیگر ملزمان کو بری کردیا تھا۔

خیال رہے کہ نور مقدم قتل کیس کا فیصلہ سامنے آنے پر وفاقی وزیر اطلاعات فواد چوہدری نے عدالت کے مرکزی ملزم کو سزا دینے کے فیصلے کو سراہتے ہوئے کہا کہ یہ ہے وہ انصاف جس کی توقع پاکستانی عوام کرتے ہیں۔

فواد چوہدری نے گزشتہ ماہ سماجی رابطے کی ویب سائٹ ٹوئٹر پر اپنے پیغام میں کہا کہ  نور مقدم کیس میں پولیس اور پراسیکیوشن نے ذمہ داری پوری کی، کیس کا فیصلہ عدالت نے 4 ماہ میں سنایا۔

وزیرِ اطلاعات فواد چوہدری نے نور مقدم قتل کیس کے فیصلے کو انصاف پر مبنی قرار دیتے ہوئے کہا کہ یہ ہے وہ انصاف جس کی توقع پاکستانی عوام کرتے ہیں، امید ہے انصاف سے جڑے ادارے عوامی توقعات پر پورا اتریں گے۔