عالمی منڈی میں تیل کی قیمتوں میں 17 فیصد تک کمی

بین الاقوامی مارکیٹ میں تیل کی قیمتوں میں 17 فیصد تک کمی ہوئی ہے،  خام تیل 120ڈالر فی بیرل سے زائد کی سطح سے کم ہو کر 112 ڈالر فی بیرل پر آگیا۔

تفصیلات کے مطابق عالمی مارکیٹ میں تیل کی قیمت روس یوکرین تنازعے کے دوران روس کے تیل پر لگائی گئی پابندی کے باعث بڑھ رہی تھی، تاہم متحدہ عرب امارات نے تیل کی پیداوار میں اضافے کا اعلان کیا جس کے بعد خام تیل کی قیمت گر گئی۔

یہ بھی پڑھیں:

عالمی مارکیٹ میں تیل کی قیمت 129ڈالر فی بیرل سے تجاوز کرگئی

متحدہ عرب امارات کے پیداوار بڑھانے کے اعلان پر برینٹ خام تیل کی قیمت فی بیرل 112 ڈالر پر آگئی ہے۔ گزشتہ روز تک برطانوی خام تیل برینٹ کی قیمت 120 ڈالر فی بیرل ہو گئی تھی۔ امریکی صدر کا کہنا تھا کہ تیل کی قیمتوں میں مزید اضافے کا خدشہ ہے۔ 

یاد رہے کہ اس سے قبل عالمی مارکیٹ میں تیل کی قیمت 2008 کے بعد بلند ترین سطح پر پہنچ گئی۔ برینٹ کروڈ آئل کی قیمت 129 ڈالر فی بیرل سے زائد ہوگئی۔ روس نے تیل کی قیمت 300 ڈالر فی بیرل تک لے جانے کی دھمکی دی تھی۔ 

آج سے 3 روز قبل کے اعدادوشمار کے مطابق گزشتہ 14 سال میں عالمی مارکیٹ میں تیل کی قیمت بلند ترین سطح پر تھی۔ دورانِ ٹریڈنگ برینٹ آئل 129 ڈالر جبکہ ڈبلیو ٹی آئی خام تیل 125 ڈالر فی بیرل سے زائد پر پہنچ گیا۔