کرپشن کا خاتمہ ہوا،ٹرانسپرنسی کی رپورٹ بدنیتی پر مبنی ہے۔علی محمدخان

اسلام آباد: وفاقی وزیرِ پارلیمانی امور علی محمد خان نے عالمی ادارے پر عدم اعتماد کا اظہار کرتے ہوئے  کہا ہے کہ کرپشن کا خاتمہ ہوگیا، ٹرانسپرنسی انٹرنیشنل کی رپورٹ بدنیتی پر مبنی ہے، حکومت ملک کو آگے لے جارہی ہے۔

تفصیلات کے مطابق گزشتہ روز میڈیا نمائندگان سے گفتگو کرتے ہوئے وزیرِ پارلیمانی امور علی محمد خان نے کہا کہ تحریکِ انصاف کی حکومت نے اعلیٰ سطح پر بدعنوانی کا خاتمہ کردیا۔ عوام مختلف بہانوں سے 70 سال سے لٹ رہے ہیں۔

یہ بھی پڑھیں:

حکومت کو سود ادا کرنے کیلئے 3000ارب قرض لینا پڑا۔ علی محمد خان

ٹرانسپرنسی کی رپورٹ نے عمران خان کی کرپشن کا بھانڈا پھوڑ دیا، بلاول بھٹو

گفتگو کے دوران وزیرِ مملکت علی محمد خان نے کہا کہ گزشتہ 7 دہائیوں سے اداروں کو تباہی کی طرف دھکیل دیا گیا۔ عمران خان کی قیادت میں ملک آگے کی طرف بڑھ رہا ہے۔ کورونا کے باعث موجود مہنگائی کی لہر پر آئندہ ماہ قابو پالیں گے۔

وزیرِ مملکت علی محمد خان نے کہا کہ عمران خان بدعنوانی اور احتساب کے معالے پر کوئی سمجھوتہ نہیں کریں گے۔ حکومت این آر او مانگنے والوں کو کیفرِ کردار تک پہنچا کر دم لے گی۔ ٹرانسپرنسی انٹرنیشنل کی رپورٹ کی بنیاد بدنیتی پر رکھی گئی ہے۔ 

خیال رہے کہ اس سے قبل پاکستان کرپشن سے پاک ممالک کی فہرست میں 140ویں نمبر پر آگیا، ٹرانسپرنسی انٹرنیشنل کا کہنا تھا کہ دنیا کے 180 ممالک کا بدعنوانی سے متعلق انڈیکس جاری کردیا گیا جس میں پاکستان کی رینکنگ میں 16 درجے کی تنزلی آئی۔

عالمی ادارے ٹرانسپرنسی انٹرنیشنل نے بدعنوانی کے اعدادوشمار پر مبنی فہرست 6 روز قبل (کرپشن پرسیپشن انڈیکس) جاری کی جس میں پاکستان کا اسکور کم ہوا۔ تجزیہ کاروں کا کہنا ہے کہ کم اسکور کرپشن میں اضافے کا عندیہ دیتا ہے۔