پاکستان کرکٹ ٹیم ٹی ٹوئنٹی اور ٹیسٹ سیریز کھیلنے کیلئے ڈھاکہ پہنچ گئی

ڈھاکہ:پاکستان کرکٹ ٹیم ٹی ٹوئنٹی اور ٹیسٹ سیریز کھیلنے کے لیے ہفتے کی صبح بنگلہ دیش کے دارالحکومت ڈھاکہ پہنچ گئی،ایک روزہ قرنطینہ کرنا ہوگا۔

ورلڈکپ اسکواڈ میں سے صرف محمد حفیظ بنگلہ دیش کے خلاف سیریز کا حصہ نہیں ہیں،ان کی جگہ افتخار احمد کو شامل کیا گیا ہے۔ کپتان بابر اعظم اور تجربہ کار آل راؤنڈر شعیب ملک بھی ٹیم کے ساتھ نہیں گئے تاہم چند روز بعد ڈھاکہ میں ٹیم کو جوائن کریں گے۔

پاکستان کرکٹ ٹیم اپنے دورہ بنگلہ دیش کے دوران تین ٹی ٹوئنٹی اور دو ٹیسٹ کھیلے گی۔اس دورے کا آغاز ٹی ٹوئنٹی سیریز سے ہوگا۔

مزید پڑھیں:سیمی فائنل ہمیں کس نے ہرایا؟

پاکستان کرکٹ ٹیم کو منگل کو ڈھاکہ آنا تھا لیکن سیمی فائنل میں آسٹریلیا سے شکست کے بعد قومی ٹیم قبل از وقت بنگلہ دیش پہنچ گئی ہے۔کورونا کا ٹیسٹ منفی آنے پر پاکستانی کرکٹرز اگلے دن سے اپنا پریکٹس سیشن شروع کر سکتے ہیں۔

فاسٹ بولر شاہنواز دہانی اور لیگ اسپنر عثمان قادرکو بھی بنگلہ دیش کے دورے کے لیے منتخب کیا گیا ہے۔امید ہے کہ ورلڈ کپ اسکواڈ کے کھلاڑیوں کو بنگلہ دیش کے خلاف موقع فراہم کیا جائے گا۔

ٹی ٹوئنٹی سیریز کے تمام میچز 19، 20 اور 22 نومبر کو کھیلے جائیں گے جبکہ ٹیسٹ میچز چٹا گاگنگ اور ڈھاکہ میں کھیلے جائیں گے۔ ٹیسٹ سیریز کے لیے ٹیم کا اعلان 15 نومبر تک کیا جائے گا۔