ملیریا، ڈینگی پروگرام کے لیے حکام نے 66 کروڑ کے اضافی فنڈ مانگ لیے

سندھ میں ڈینگی اور ملیریا کے کیس بڑھنے کے بعد ڈینگی اور ملیریا پروگرامز کے اعلیٰ حکام جاگ گئے، اعلیٰ حکام نے حکومت سے 66 کروڑ کے اضافی فنڈ مانگ لیے ہیں۔

اضافی فنڈ کے ساتھ ساتھ اعلیٰ حکام کی جانب سے نئی گاڑیوں اور کنٹریکٹ ملازمین کو بھی مستقل کرنے کا مطالبہ کیا گیا ہے۔ 

رواں مالی سال میں 38 کروڑ بجٹ رکھنے والے ملیریا پروگرام کو 9 کروڑ جاری بھی کردیے ہیں، بجٹ کے علاوہ بھی فنڈ طلب کیے گئے ہیں۔

یاد رہے محکمہ خزانہ نے 23 ضلع کونسلز کو مچھر مار اسپرے کی مشینوں کی خریداری کے لیے 48 کروڑ جاری کیے ہیں، لیکن اس کے باوجود صوبے میں اب تک کہیں اور بالخصوص کراچی میں مچھر مار اسپرے مہم کا آغاز نہیں ہوسکا ہے۔

واضح رہے کہ سندھ میں سیلابی صورتحال کے بعد ملیریا اور ڈینگی کے کیسز میں بے انتہا اضافہ سامنے آیا ہے، صوبے میں اب تک ملیریا کے ایک لاکھ 33 ہزار اور ڈینگی کے 4 ہزار سے زائد کیسز رپورٹ ہوچکے ہیں۔