عمرہ زائرین کے لیے حرم مکی میں 5 ہزار برقی گاڑیاں اور وہیل چیئرز تیار

ریاض:سعودی حکومت نے بیت اللہ میں حاضری کا شرف حاصل کرنے والے اللہ کے مہمانوں کی خدمت اور سہولت کے لیے ایک اور قدم اٹھانے کا فیصلہ کرلیا ہے۔

انہی مساعی جمیلہ کے ضمن میں حرمین جنرل پریزیڈینسی نے حرم مکی میں اللہ کے مہمانوں کی سہولت کے لیے 600 برقی اور 5 ہزار وہیل چیئرز تیار کی ہیں۔جس سے عمرہ زائرین مستفید ہوں گے۔

عرب ٹی وی کے مطابق ان گاڑیوں کی نگرانی پر 120 ملازمین کا عملہ مامور ہے جو عازمین عمرہ کی حفاظت اور سلامتی کو یقینی بنانے کے لیے ہمہ تن مصروف عمل ہے۔

مسجد حرام میں نقل وحرکت کے لیے استعمال ہونے والی ان برقی اور وہیل چیئرز کو ہرقسم کے مضر جراثیم سے پاک رکھنے کے لیے جراثیم کش اسپرے سے صاف کیا جاتا ہے۔

واضح رہے کہ مسجد حرام کے اندرونی مقامات میں نقل وحرکت کے لیے تیار کردہ ان گاڑیوں کو 7 مختلف مقامات پر رکھا گیا ہے۔جب کہ مسجد کے باہر تین مقامات پر بھی یہ گاڑیاں دستیاب ہیں۔

دستی اور برقی گاڑیوں کی سہولت کا مقصد رش سے بچنا اور سماجی فاصلے کو یقینی بنانے کے ساتھ بیت اللہ میں حاضری دینے والے اللہ کے مہمانوں کی خدمت کرنا ہے۔اس کے علاوہ حرمین کی انتظامیہ نے معتمرین میں 400 چھتریاں اور رومال بھی تقسیم کیے ہیں۔