ڈاؤ یونیورسٹی میں آکسیجن سلنڈر چوری کرنے کی کوشش ناکام ،2ملزمان گرفتار

کراچی : ڈاؤ یونیورسٹی اوجھا کیمپس کے کورونا وارڈ ایم ڈی آر سے آکسیجن سلنڈر چوری کرنے کی کوشش ناکام بنادی گئی، سیکورٹی اہلکاروں نے 2ملزمان کو رنگے ہاتھوں پکڑکر دو  آکسیجن سلنڈر برآمد کرلئے۔

ملزمان کو مالِ مسروقہ سمیت پولیس کے حوالے کردیا گیا ہے، ڈاؤ یونیورسٹی آف ہیلتھ سائنسز کے کورونا وارڈ میں آکسیجن سلنڈر سپلائی کرنے والے ٹھیکیدار کی شکایت پر سیکورٹی چیک بڑھا دیا گیا تھا۔

شکایت میں بتایا گیا تھا کہ بعض افراد سلنڈر چوری کرنے کی کوشش کرتے ہوئے ناکام ہو کر فرار ہوگئے۔ گذشتہ شب ملزمان نے ٹھیکیدار کے خیمے سے آکسیجن سلنڈر چوری کرکے رکشہ میں رکھ لیا اور وہ لیکر فرار ہورہے تھے، تاہم سیکورٹی اہلکاروں نے انہیں دھر لیا۔

مزید پڑھیں: میمن گوٹھ میں کومبنگ آپریشن، گھر گھر تلاشی، 6 ملزمان گرفتار

مبینہ ملزمان کے نام خاور نعیم خان ولد نعیم اللہ خان اور میز الدین ولد نعیم الدین بتائے گئے ہیں، ملزمان کنٹریکٹر کے سابق عارضی ملازم بتائے جاتے ہیں جنھیں کنٹریکٹ ختم ہونے پر فارغ کردیا گیا تھا۔

ڈاؤ یونیورسٹی انتظامیہ نے واقعے کے بعد سیکورٹی مزید سخت کردی ہے، سیکورٹی اہلکاروں نے سچل تھانے میں مقدمہ درج کرادیا ہے۔