گوگل نیوز پر ہمیں فالو کریںسمندری طوفان فیکسائی جاپان میں تباہی مچانے کے بعد بحرالکاہل کی جانب رخ اختیارکرگیا ، طوفان سے ایک خاتون ہلاک اوردرجنوں زخمی ہونےکی اطلاعات ہیں۔
سمندری طوفان آج جاپان سےٹکرایاتھا انتہائی تندو تیز ہوااوربارشوں کےباعث نظام زندگی بری طرح سے متاثرہوا، درجنوں پروازیں منسوخ ہونے سے ہزاروں مسافر ہوائی اڈوں پر پھنس گئےجبکہ ٹرینوں کی آمدورفت بھی کئی گھنٹوں تک معطل رہی۔ جب کہ طوفان کے نتیجے میں 10 لاکھ کے قریب گھر بجلی سےمحروم ہوگئے۔
طوفان کے نتیجے میں جاپان کے ساحلی شہر چھیبا میں موسلا دھار بارشیں ہوئی اور 120 میل فی گھنٹہ کی رفتار سے ہوائیں چلیں جس سے شہر میں سیلابی صورتحال پیدا ہوگئی۔
طوفان نے ٹوکیو شہر کو بھی متاثر کیا جس سے شہر میں ٹرانسپورٹ کا نظام مفلوج ہوگیا جس کے باعث شہر کے بڑے ریلوے اسٹیشنوں پر بلٹ ٹرین اور سب وے سروسز کے لیے مسافروں کا جم غیر جمع ہوگیا۔ ٹوکیو میں طوفان ’ فیکسائی‘ کے باعث207 کلومیٹر فی گھنٹے کی رفتار سے ہوائیں چلیں اور شدید بارش ہوئی جبکہ دیوار سے ٹکرانے پر ایک خاتون ہلاک اورمختلف حادثات میں 30 افراد زخمی ہو گئے۔
بارش اور طوفانی ہواؤں کے باعث درخت جڑ سے اکھڑ گئے ،بجلی کے پول گر گئے جسکے باعث10 لاکھ سے زائد افراد کوبجلی کی فراہمی منقطع ہو گئی۔
طوفان کے باعث ٹوکیو شہر میں متاثر ہونے والی ٹرین سروس عارضی بحال ہوگئی ہے تاہم تمام ٹرینیں تاخیر کا شکار ہیں جب کہ ٹوکیو کے ائیرپورٹس سے چلنے والی 100 سے زائد پروازیں منسوخ کردی گئی ہیں، اس کے علاوہ ٹوکیو اور یوکوماہا سے ہنیڈا ائیرپورٹ تک چلنے والی تمام ٹرینیں بھی منسوخ ہیں۔
سمندری طوفان اب بحرالکاہل کی جانب واپس جارہا ہے تاہم مذکورہ علاقوں میں سیلاب اور لینڈ سلائیڈنگ کا خدشہ ہے، حکام نےشہریوں کوگھروں میں رہنےکی ہدایات جاری کی ہیں۔
