مینارِ پاکستان ہراسگی، ریمبو کا ویڈیو بیان، عائشہ کی کارروائی کی درخواست

مینارِ پاکستان ہراسگی کیس میں ٹک ٹاکر خاتون عائشہ اکرام کے گرفتار ساتھی ریمبو کا ویڈیو بیان سامنے آگیا جبکہ عائشہ نے حکام سے ریمبو کے خلاف قانونی کارروائی کی درخواست کی ہے۔

تفصیلات کے مطابق عائشہ اکرم کا کہنا ہے کہ تمام تر واقعے کا ذمہ دار ریمبوہے۔ اپنے ویڈیو بیان میں ریمبو نے کہا کہ میں جانتا ہوں کہ عائشہ اکرم کو زندہ نکال کر گھر کیسے لے گیا۔ نہ یہ میری غلطی ہے، نہ عائشہ کی۔ اسے مینارِ پاکستان کسی اور کے ساتھ جانا تھا جس کے بھائی کا انتقال ہوگیا۔ پھر مجھے وہاں جانا پڑ گیا۔

دوسری جانب ٹک ٹاکر عائشہ نے اپنے بیان میں کہا کہ ریمبو اور اس کے ساتھیوں نے میرے کپڑے پھاڑے اور برہنہ کیا۔ انہوں نے میری نقدی اور زیورات چھین لیے۔ ریمبو نے وہاں پہلے سے دوستوں کو بلوایا ہوا تھا۔ ریمبو سمیت تمام ملزمان نے مجھے رش میں دھکیل دیا۔ لوگوں نے میرے ساتھ چھیڑ چھاڑ اور بد تمیزی شروع کردی۔

 یہ بھی پڑھیں

      ریمبو اور اس کے ساتھیوں کو عائشہ کے کہنے پر گرفتار کیا۔پولیس

ٹک ٹاکر خاتون نے پولیس کو ریمبو اور ساتھیوں کے خلاف قانونی کارروائی کی درخواست کی ہے۔ گزشتہ روز اپنے بیان میں عائشہ کا کہنا تھا کہ ریمبو نے ساتھیوں کے ہمراہ میری نازیبا ویڈیوز بنائیں جن کی بنیاد پر مجھے بلیک میل کیا جاتا ہے۔ بلیک میلر ریمبو اب تک مجھ سے 10 لاکھ روپے حاصل کرچکا ہے۔ 

خیال رہے کہ اِس سے قبل ڈی آئی جی انویسٹی گیشن شارق جمال کا کہنا تھا کہ گریٹر اقبال پارک میں ملوث ملزم ریمبو سمیت 7 ملزمان کو خاتون ٹک ٹاکر عائشہ سے بدتمیزی اور ہراسگی کے الزامات میں گرفتار کیا گیا جس کے خلاف قانونی کارروائی ہوگی۔

گزشتہ روز پولیس نے تفصیلات بتاتے ہوئے کہا کہ گریٹر اقبال پارک کی متاثرہ خاتون عائشہ کے تحریری بیان کی روشنی میں ملزم ریمبو اور اس کے دیگر 7 ساتھیوں کو گرفتار کیا۔ خاتون عائشہ نے ریمبو سمیت 12 ملزمان کے خلاف تحریری درخواست دائر کی تھی۔