گستاخانہ کتاب کے مصنف سلمان رشدی پر حملہ کرنیوالے ملزم کی شناخت ظاہر کردی گئی

نیویارک: گستاخانہ کتاب کے مصنف سلمان رشدی پر قاتلانہ حملہ کرنیوالے ملزم کی شناخت ظاہر کردی گئی۔

گزشتہ روز امریکا میں سلمان رشدی پر چاقو سے حملہ ہوا جس کے نتیجے میں وہ شدید زخمی ہوا۔

برطانوی اخبار ڈیلی میل کی رپورٹ میں بتایا گیا ہے کہ سلمان رشدی پر حملہ امریکی ریاست نیویارک کے علاقے شوٹاکوا میں اس وقت ہوا جب وہ ایک تقریب سے خطاب کیلئے اسٹیج پر پہنچا۔

جمعے کی صبح سی ایچ کیو 22 کے عنوان سے منعقدہ تقریب میں سلمان رشدی کو خطاب کرنا تھا اور جیسے ہی وہ اسٹیج پر آیا ایک شخص نے اس پر حملہ کردیا۔

برطانوی اخبار کی رپورٹ کے مطابق حملہ آور نے اسٹیج پر آکر سلمان رشدی اور انٹرویو لینے والے ایک شخص پر چاقو سے حملہ کیا۔ بی بی سی کے مطابق سلمان رشدی کی گردن پر زخم آیا ہے۔

یہ بھی پڑھیں:

بلوچستان میں موسلادھار بارشوں سے تباہی، قلعہ عبداللہ میں 3 ڈیم ٹوٹ گئے

عینی شاہدین کے مطابق حملے کے فوری بعد سلمان رشدی کو وہاں سے لے جایا گیا جبکہ حملہ آور کو حراست میں لے لیا گیا۔

تاہم، اب پولیس کی جانب سے  سلمان رشدی پرحملہ کرنیوالےملزم کی شناخت ظاہرکردی گئی ہے۔

نیویارک پولیس کے مطابق سلمان رشدی پر 24 سالہ ہادی مطاری نامی شخص نے چاقو سے حملہ کیا، اس کا  تعلق امریکی ریاست نیوجرسی سے ہے۔ اس نےکیلی فورنیا کے الزبتھ لرننگ سینٹر سے تعلیم حاصل کی۔

پولیس کا کہنا ہے کہ ہادی مطاری کی جانب سے حملے کی وجہ تاحال واضح نہیں ہوسکی۔

یاد رہے کہ سلمان رشدی کو توہین آمیز تصنیف کی وجہ سے ماضی میں بھی قتل کی دھمکیاں ملتی رہی ہیں اور 1988 میں اس معاملے پر برطانیہ میں بھی متعدد مظاہرے ہوئے تھے۔

پاکستان نے سلمان رشدی کی گستاخانہ کتاب پر پابندی عائد کردی تھی جبکہ ایران کے آیت اللہ خمینی نے 1989 میں رشدی کو واجب القتل قرار دینے کا فتویٰ دیا تھا۔