صنعتوں کو تباہی سے بچانے کیلئے گیس فراہم کی جائے ،زبیر موتی والا

کراچی : بزنس مین گروپ کے چیئرمین اور سائٹ ایسوسی ایشن آف انڈسٹری کے سرپرست اعلیٰ زبیر موتی والا نے سائٹ ایریا کی مقامی اور برآمدی صنعتوں کو گیس کی عدم فراہمی پر گہری تشویش کا اظہار کرتے ہوئے حکومت سے مطالبہ کیا ہے کہ مقامی اور برآمدی صنعتوں کو گیس کی فراہمی کے احکامات جاری کیے جائیں۔

چیئرمین بی ایم جی زبیر موتی والا ،وائس چیئرمین بی ایم جی جاوید بلوانی ،صدر سائٹ ایسوسی ایشن عبدالرشید ،سینئر نائب صدر سعود محمود ،نائب صدر کامرنا عربی ،سابق صدر سلیم پاریکھ اور عبدالہادی نے جمعرات کو پریس کانفرنس کرتے ہوئے نشاندہی کی کہ سائٹ ایریا کو گزشتہ کئی ماہ سے طلب کے مطابق گیس فراہم نہیں کی جارہی ہے۔

سوئی سدرن گیس کمپنی اگر گیس دیتی بھی ہے تو کبھی گیس پریشر ایک پونڈ تو کبھی آدھا پونڈ ہوتا ہے جس کا مطلب گیس نہ ہونے کے برابر ہے جس سے انڈسٹری نہیں چل سکتی ہے۔

انہوں نے کہا کہ سندھ سے نکلنے والی گیس پر پہلا حق سندھ کا ہے لہٰذا پہلے سندھ کی گیس کی طلب کو پورا کیا جائے اور بقیہ گیس دیگر صوبوں کو دی جائے ۔

جس طرح کے پی حکومت نے آرٹیکل 158پر عمل درآمد کیا اسی طرح سندھ حکومت بھی آرٹیکل 158پر عملدرآمد کرے۔

انہوں نے بجلی کے زائد نرخوں کے حوالے سے کہا کہ بجلی کے زائد نرخوں کی وجہ سے انڈسٹری خاص طور پر چھوٹی صنعتوں کی پیداواری لاگت میں بہت زیادہ اضافہ ہوگیا ہے۔

حکومت کو بجلی کے نرخوں میں کمی پر سنجیدگی سے غور کرنا چاہیے کیونکہ چھوٹی صنعتوں پر 34فیصد سیلز ٹیکس کا نفاذ کہاں کا انصاف ہے َ؟ حکومت ایک طرف کیپٹو پاور پلانٹ بند کررہی ہے تو دوسری طرف بجلی کے نرخ آسمان پر جارہے ہیں۔

مزید پڑھیں:انکم ٹیکس آرڈیننس کی تیسری ترمیم بزنس کمیونٹی کیلئے نقصان دہ اور مایوس کن ہے،ناصر مگوں

حکومت نہ گیس دیتی ہے اور نہ گیس سے بجلی بنانے دیتی ہے تو ایسے میں کس طرح صنعتیں چلائیں۔زبیر موتی موالا نے کہا کہ حکومت صنعتوں کے مقابلے میں گھریلو صارفین کو ترجیح دیتی ہے حالانکہ دنیا بھر میں مقامی اور برآمدی شعبوں کو معاشی سرگرمیوں میں پہلی ترجیح دی جاتی ہے مگر پاکستان میں صنعتوں کو اولین ترجیح حاصل نہیں۔

انہوں نے حکومت سے مطالبہ کیا کہ گیس کی فراہمی کے حوالے سے پہلی ترجیح کراچی کی ان صنعتوں کو دی جائے جو قومی برآمدات میں 54فیصد سے زیادہ کی حصہ دار ہیں اور سب سے زیادہ روزگار فراہم کرنے کے علاوہ حکومت کو سب سے زیادہ ٹیکس بھی دیتی ہیں ۔

بی ایم جی رہنماؤں اور سائٹ ایسوسی ایشن کے عہدیداروں نے حکومت کو تجویز دی کہ شہری اور دیہی علاقوں میں گھریلو کنکشن ختم کرکے شہری علاقوں میں ایل پی جی اور دیہی علاقوں میں بائیو گیس کو دوسرے ذرائع میں تبدیل کیا جائے جس سے یقینی طور پر توانائی بحران پر قابو پانے میں مدد ملے گی ۔

نیز حکومت گیزر کے استعمال کو گیس سے سولر اور بجلی پر منتقل کرنے کے لیے منصفانہ پالیسی بھی متعارف کرائے۔

زبیر موتی والا اور سائٹ ایسوسی ایشن کے عہدیداروں نے سندھ حکومت سے مطالبہ کیا کہ سائٹ ایریا کے انفرااسٹرکچر کو بہتر بنانے ،سڑکوں کی تعمیر و مرمت کے لیے مزید 3ارب کی ضرورت ہے ۔ایک ارب فنڈز جو دیئے گئے ہیں وہ سست روی کا شکار ہیں لہذا فنڈز کی منتقلی میں تیزی آنی چاہیے ۔