وزیراعظم نے نصاب تعلیم میں ضرورت کے مطابق تبدیلیوں کا حکم دیدیا

اسلام آباد:وزیر اعظم عمران خان نے وزارت تعلیم کی قومی نصاب پر عملدرآمد کی اب تک کی کارکردگی پر اطمینان کا اظہار کرتے ہوئے نصاب تعلیم میں ضرورت کے مطابق تبدیلیوں کا حکم دیدیاہے

وزیر اعظم عمران خان کی زیر صدارت قومی یکساں نصاب تعلیم پر عملدرآمد کے حوالے سے جائزہ اجلاس میںوفاقی وزیر شفقت محمود، معاون خصوصی ڈاکٹر شہباز گل، پارلیمانی سیکریٹری وجیہہ اکرم اور وفاقی وزارت تعلیم کے سینئر افسران کی شرکت کی،وفاقی وزیر شفقت محمود نے اجلاس کو نصاب تعلیم میں شامل سیرت النبی ﷺکی تعلیمات کے حوالے سے تفصیلی بریفنگ دی۔

مزید پڑھیں:نجی اسکولز اور وفاق سندھ میں تعلیمی اداروں کی بندش کیخلاف ایک ہوگئے

بریفنگ میں بتایا گیا کہ نصاب کی تیاری کے ضمن میں تمام مکاتب فکر خصوصا علماء کرام سے تفصیلی مشاورت کی گئی ہے جبکہ اساتذہ کی ٹریننگ اور امتحانات کے معیار پر بھی توجہ دی گئی ہے۔

وزیر اعظم عمران خان نے وزارت تعلیم کی قومی نصاب پر عملدرآمد کی اب تک کی کارکردگی پر اطمینان کا اظہار کرتے ہوئے کہا کہ چھٹی تا بارہویں جماعت کے لیے نصاب کو اس سال کے آخر تک حتمی شکل دے دی جائے،نصاب تعلیم پر عملدرآمد کا مسلسل جائزہ لیا جائے اور ضرورت کے مطابق اس میں تبدیلیاں لائی جائیں۔

وزیر اعظم نے کہا کہ سیرت النبی ﷺ ہی ہماری نئی نسل کے لئے مشعل راہ ہے،نبی آخر الزماں ﷺکی سیرت کا سب سے اہم پہلو اخلاق و آداب اور حسن معاشرت ہے۔ تمام معاشرتی مسائل کا بہترین حل سیرت النبی ﷺ کی تعلیمات میں موجود ہے۔

انہوں نے کہا کہ تاریخ اسلام کے ساتھ ساتھ رسول اللہ ﷺکی حیات مبارکہ سے ماخذ سنہرے اصول بچوں کو پڑھائے اور سمجھائے جائیں،قومی یکساں نصاب تعلیم پر عملدرآمد کے عمل کو صوبائی حکومتوں کے اشتراک سے جلد مکمل کیا جائے۔