گوگل نیوز پر ہمیں فالو کریںاسلام آباد: وزیراعظم عمران خان کا کہنا ہے کہ عوام کورونا کی چوتھی لہر سے بچنے کیلئے احتیاط کا دامن ہاتھ سے نہ چھوڑیں، انہوں نے کہا کہ اس وقت ہمارے پاس ویکسین موجود ہے، عوام اس کا فائدہ اٹھائیں۔
وزیر اعظم عمران خان نے کہا کہ کورونا وباء اپنی ہیت مسلسل تبدیل کرتا رہا ہے۔ پاکستان سمیت دنیا بھر کے لیے بڑا مسئلہ بھارت سے پھیلنے والا کورونا وائرس ہے۔ اگر ہم چوتھی لہر سے نکل گئے تو ملک کو تباہی سے بچا لیں گے۔
وزیر اعظم نے کہا کہ عالمی جریدے دی اکانومسٹ نے پاکستان کو کورونا سے مقابلہ کرنے والے تین بہترین ملکوں میں شامل کیا ہے، پاکستانی عوام نے ثابت کیا کہ وہ اپنی حکومت کے ساتھ کھڑے ہیں۔اور احتیاطی تدابیر پر عمل پیرا ہیں۔
وزیراعظم نے کہا کہ مکمل ویکسین لگانے تک لہریں آتی رہیں گی، شہری ویکسین لازمی لگوائیں۔ اگر ہم چوتھی لہر سے نکل گئے تو ملک کو تباہی سے بچا لیں گے۔ملک میں عالمی وبا کورونا وائرس کے کیسز بڑھنے پر تشویش کا اظہار کرتے ہوئے انہوں نے کہا کہ عوام کو احتیاط کا دامن ہاتھ سے نہیں چھوڑنا چاہیے۔
وزیراعظم عمران خان کا کہنا تھا کہ اللہ تعالیٰ کا پاکستان پر ابھی تک خاص کرم ہے۔ کورونا کے تدارک کیلئے نیشنل کمانڈ اینڈ آپریشن سینٹر (این سی او سی) نے بڑے اچھے فیصلے کیے۔انڈین قسم کا وائرس اس وقت بنگلا دیش اور افغانستان تک پہنچ چکا ہے، ہمیں بہت احتیاط کرنا ہوگی۔ انڈونیشیا کے حالات بہت خراب ہیں۔
ان کا کہنا تھا کہ میں کورونا ایس او پیز پر عمل کرنے کی دوبارہ اپیل کرتا ہوں۔ کورونا کی چوتھی لہر سے بہت خوف ہے۔ شہری ماسک لازمی پہنیں، احتیاط کرکے ہم ہم اپنی معیشت کو بچا سکتے ہیں۔
وزیراعظم عمران خان کی جانب سے عوام سے پرزور اپیل کی گئی کہ عید کے دوران ایس او پیز پر عمل کرنا ہوگا۔ ہم نے احتیاط کر لی تو چوتھی لہر سے ملک کو بچا لیں گے۔کورونا کیسز بڑھیں گے تو لوگوں کا روزگار متاثر ہوگا۔ لاک ڈاؤن سے بچنے کے لیے ابھی سے احتیاط کریں۔
خیال رہے کہ گزشتہ چوبیس گھنٹوں کے دوران کورونا وائرس کے باعث صوبہ سندھ کے بعد پنجاب میں سب سے زیادہ اموات ریکارڈ کی گئی ہیں۔ ملک بھر میں کورونا وائرس سے 24 اموات ہوئیں جن میں سے 15 اموات وینٹی لیٹرز پر موجود مریضوں کی تھیں۔
مزید پڑھیں: ملک کی معاشی ترقی کیلئے طویل المدتی منصوبہ بندی ضروری ہے۔وزیرِ اعظم
