بلوچستان میں دہشتگردوں کے حملوں کے بعد ملک بھر میں ہائی الرٹ جاری

اسلام آباد: بلوچستان کے علاقے پنجگور اور نوشکی میں دہشت گرد حملے کے بعد وزارت داخلہ نے ملک بھر کے لیے ہائی الرٹ جاری کردیا۔

ذرائع کے مطابق وزارت داخلہ کی جانب سے ملک بھر کے لئے ہائی الرٹ جاری کردیا گیا، جس میں تمام قانون نافذ کرنے والے اداروں کو سیکیورٹی کے سخت انتظامات کرنے کا کہا گیا ہے۔

دہشت گردوں سے مقابلے میں جام شہادت نوش کرنے والے بہادر سپوتوں کے جذبے کی تعریف کرتے ہوئے وزارتِ داخلہ نے کہا کہ شہدا کو پوری قوم سلام اور نذرانہ عقیدت پیش کرتی ہے۔

بلوچستان میں دہشتگردوں کے حملوں کے بعد وزارتِ داخلہ کی جانب سے کہا گیا ہے کہ بلوچستان فرنٹیئر کانسٹیبلری (ایف سی) نے دہشت گردوں کا حملہ کامیابی سے ناکام بنایا اور دشمن کے عزائم کو خاک میں ملا دیا ہے۔

مزید پڑھیں: بلوچستان میں حملے، 15 دہشت گرد ہلاک، 4 فوجی جوان شہید

یاد رہے کہ ایک روز قبل بلوچستان کے علاقوں پنجگور اور نوشکی میں سیکیورٹی فورسز نے دہشت گردوں کے حملوں کو ناکام بنایا اور کلیئرنس آپریشن کیا، جس میں 13 دہشت گردہلاک ہوئے جبکہ فائرنگ کے تبادلے میں پاک فوج کے 7 جوان شہید اور 3 زخمی بھی ہوئے تھے۔