آسٹریلیا کو شکست دینے کیلئے بہترین حکمت عملی تیار کی ہے، فواد عالم

کراچی: پاکستان کے ٹیسٹ بیٹر فواد عالم نے کہا ہے کہ آسٹریلیا جیسی مضبوط ٹیم کو اپنی ہی سرزمین پر شکست دینے کے لیے ایک اچھی حکمت عملی تیار کی ہے۔

ٹیسٹ کرکٹر فواد عالم نے نیشنل اسٹیڈیم کراچی میں میڈیا سے گفتگو کرتے ہوئے کہا کہ ٹیسٹ سیریز کے لیے کیمپ بہت اچھا جارہا ہے، میچ سینیریو پریکٹس بھی کی ہے، آسٹریلیا کو سامنے رکھ کر ٹریننگ بھی اچھی چاہیے۔

اُنہوں نے کہا کہ سیریز کیلیے جتنی تیاری ہونی چاہیے وہ مکمل ہے، جب آسٹریلیا 1998 میں آئی تھی تو میں نے تماشائیوں کے اسٹینڈز میں بیٹھ کر میچ دیکھا تھا، خوشی ہے کہ اب اسی ٹیم کے خلاف گراونڈ میں اتریں گے۔

انہوں نے کہا کہ بابر اعظم سے بہت سیکھنے کو ملتا ہے، کیمپ میں میچ سینیریو سے کھلاڑیوں کو بہت فائدہ ہوا، سابق قومی کپتان اور اپنے دور کے مستند بیٹسمین محمد یوسف کے بطور بیٹنگ کوچ آنے سے بہت فائدہ ہوگا۔

انہوں نے کہا کہ آسٹریلیا جیسی مضبوط ٹیم کو اپنی ہی سرزمین پر شکست دینے کے لیے ایک اچھی حکمت عملی تیار کی ہے لیکن اگر حکمت عملی بتائی تو آسٹریلیا کو پتہ چل جائے گی، مقامی کنڈیشنز کو دیکھ کر حکمت عملی کی منصوبہ بندی ہوگی۔

انہوں نے کہا کہ پوری قوم سے درخواست ہے کہ وہ ہماری کامیابی کیلئے دعا کرے،ہمارا کامبی نیشن بہت اچھا چل رہا ہے، اسپنرز اورفاسٹ بولرز اچھے ردھم میں ہیں، امید ہے اچھی کرکٹ کھیلیں گے اور سیریز جیتیں گے۔

فواد عالم کا کہنا تھا کہ قومی کپتان بابراعظم اور محمد رضوان ورلڈ کلاس پلیئر ہیں، ان کی پرفارمنس ہم سب کے سامنے عیاں ہے، ہم جیسے کھلاڑی تو بابراور رضوان کے قریب بھی نہیں جاسکتے۔

مزید پڑھیں: پی ایس ایل7کا دلچسپ میچ، پشاور زلمی نے لاہور قلندرز کو شکست دے دی

ٹیسٹ کرکٹر کا کہنا تھا کہ مجھے بیٹنگ میں جہاں موقع ملے گا، اسی پوزیشن پر کھیلوں گا، مجھے کوئی بیٹنگ کا اسٹائل تبدیل کرنے کا نہیں کہتا، اگرآسٹریلیا کے خلاف ون ڈے سیریز میں بھی موقع دیا گیا تو میری خدمات حاضر ہوں گی۔