اچھا ہوا ضمیر فروش بے نقاب ہو گئے، بلیک میل نہیں ہوں گا، وزیر اعظم

اسلام آباد: وزیراعظم عمران خان نے منحرف ارکان کے سامنے آنے کے بعد اپنا رد عمل دیتے ہوئے کہا ہے کہ اچھا ہوا ضمیرفروش بے نقاب ہوگئے، انہوں کہا کہ بلیک میل نہیں ہوگا۔

وزیر اعظم عمران خان کی زیر صدارت ترجمانوں کے اجلاس کا انعقاد کیا گیا، دوران اجلاس وزیر اعظم عمران خان نے آج ہونے والی سیاسی پیشرفت کے بارے میں گفتگو کی۔

وزیر داخلہ شیخ رشید نے اجلاس کے دوران سندھ میں گورنر راج لگانے کی تجویز پیش کی، جس پر وزیر اعظم عمران خان خاموش رہے، ترجمانوں نے نمبر گیم پر مختلف سوالات کیے۔

وزیر اعظم عمران خان کا کہنا تھا کہ کہ تسلی رکھیں جیت ہماری ہو گی، کسی طور پر بھی اپنے نظریے سے پیچھے نہیں ہٹوں گا، ان حرکتوں سے بلیک میل نہیں ہوں گا۔

وزیراعظم عمران خان نے اجلاس کے دوران منحرف ارکان کو ضمیر فروش قرار دیا، انہوں نے کہا کہ اچھا ہوا ضمیر فروش بے نقاب ہو گئے، اپوزیشن کی اس چال کے باوجود تحریک عدم اعتماد میں ہم کامیاب ہوں گے۔

ذرائع کا کہنا ہے کہ وزیراعظم عمران خان سے اسپیکر قومی اسمبلی اسد قیصر نے ملاقات کی، ملاقات میں وزیراعظم نے قانونی ٹیم کو منحرف ارکان کے خلاف کارروائی کی ہدایت کردی ہے۔

مزید پڑھیں: وزیر اعظم عمران خان سندھ میں گورنر راج لگادیں، وزیر داخلہ شیخ رشید

اس حوالے سے پاکستان تحریک انصاف (پی ٹی آئی) نے اپنے منحرف ارکان پارلیمنٹ کے خلاف قانونی و آئینی کارروائی کا فیصلہ کرلیا ہے۔جس کے لیے سپیکر کو باقاعدہ لکھا جائے گا۔