شعیب اختر سے ناشائستہ رویہ، ڈاکٹر نعمان نیاز کا ردِ عمل سامنے آگیا

قومی کرکٹ ٹیم کے سابق فاسٹ بالر شعیب اختر سے ناشائستہ رویہ اختیار کرنے والے ڈاکٹر نعمان نیاز نے سوشل میڈیا پر وائرل ویڈیو پر ردِ عمل دیتے ہوئے کہا ہے یکطرفہ کہانی ہمیشہ اپنی طرف متوجہ کرتی ہے۔

سماجی رابطے کی ویب سائٹ ٹوئٹر پر اپنے پیغام میں سرکاری ٹی وی چینل (پی ٹی وی اسپورٹس) کے میزبان ڈاکٹر نعمان نیاز نے کہا کہ شعیب اختر کو ایک اسٹار کے طور پر یاد کرنے پر حیرت ہے کیونکہ وہ بہترین ستاروں میں سے بہترین ہیں۔

یہ بھی پڑھیں:

سرکاری ٹی وی اینکر کا ناشائستہ رویہ، شعیب اختر نے لائیوشو میں استعفیٰ دیدیا

نازیبا ویڈیو کا معاملہ، ثانیہ عاشق کی ایف آئی اے سے کارروائی کی درخواست

ٹی وی میزبان ڈاکٹر نعمان نیاز نے کہا کہ راولپنڈی ایکسپریس کہلانے والے شعیب اختر  نے پاکستان کیلئے جو اعزازات حاصل کیے، ان سے انکار نہیں کیا جاسکتا تاہم کسی بھی واقعے پر یکطرفہ بیان اپنی طرف توجہ مبذول کراتا ہے۔

I wonder why one has to be reminded @shoaib100mph is a star. He has been the best of the best, he shall always be. He has brought laurels to the country is undeniable. One side of the story always attracts nonetheless having been friends for ages I’ll always wish him the best.

— Dr. Nauman Niaz (@DrNaumanNiaz) October 26, 2021

سرکاری ٹی وی شو کے دوران شعیب اختر کو اٹھ کر جانے کا کہنے والے ڈاکٹر نعمان نیاز نے کہا کہ میں اور شعیب اختر طویل عرصے سے ایک دوسرے کے دوست ہیں اور میں ہمیشہ ان کے بہتر مستقبل کیلئے نیک تمناؤں کا اظہار کرتا رہوں گا۔ 

خیال رہے کہ اس سے قبل دنیا کے تیز ترین فاسٹ بالر اور قومی کرکٹ ٹیم کے سابق کھلاڑی شعیب اختر نے سرکاری ٹی وی اینکر کے ناشائستہ رویے پر براہِ راست (لائیو) شو کے دوران استعفیٰ دے دیا اور کہا کہ مجھے معلوم نہیں نعمان نیاز نے ایسا کیوں کیا۔

گزشتہ روز نیوزی لینڈ کے خلاف جیت کے بعد شعیب اختر نے آئی سی سی ٹی ٹوئنٹی ورلڈ کپ کے دوران شاندار کارکردگی پر قومی کرکٹ ٹیم کے کھلاڑی حارث رؤف کو سراہا اور اس کا کریڈٹ لاہور قلندرز کے پلیئر ڈویلپمنٹ پروگرام کو دے دیا۔