سول ایوی ایشن نے 6پاکستانی ایئرلائنز کو تنبیہی مراسلہ جاری کردیا

کراچی:سول ایوی ایشن اتھارٹی نے متحدہ عرب امارات کی جاری کردہ کورونا ایس او پیز پر مکمل عمل درآمد نہ کرنے پر چھ پاکستانی ایئرلائنز کو تنبیہی مراسلے جاری کردئیے ہیں۔

سول ایوی ایشن کی جانب سے تنبہیی مراسلہ پی آئی اے، ایئربلیو، سیرین ایئر، ایئرسیال، ویژن ایئر اور ایئرفیلکن کو جاری کیا گیا ہے، ڈائریکٹر فلائٹ اسٹینڈرڈ سی اے اے افتخار جے عثمانی کی جانب سے تنبہیی مراسلہ جاری کیا گیا۔

مراسلے میں متحدہ عرب امارات(یو اے ای)کی سول ایوی ایشن اتھارٹی کے اعتراضات و تحفظات کو جواز بناتے ہوئے تنبہیی مراسلہ جاری کیا گیا۔

یو اے ای حکام کی جاری کردہ کورونا ایس اوپیز پر دوبارہ عمل درآمد میں ناکامی پر متعلقہ ایئرلائن کا یو اے ای کے لئے فلائٹ آپریشن بند کرنے کی وارننگ دی گئی ہے۔

ڈائریکٹر فلائٹ اسٹینڈرڈ سی اے اے افتخار جے عثمانی کے مطابق پاکستان سے امارات کے لیے دوطرفہ پروازوں پر کورونا ایس اوپیزپر عمل درآمد لازم تھا۔

مزید پڑھیں: پی آئی اے نے فجیرہ، متحدہ عرب امارات کیلئے پروازوں کا آغاز کردیا

کورونا وائرس سے متاثرہ مریضوں کے لیے کیبن میں علیحدہ سے صرف ایک قطار مختص اور سیٹوں کا فاصلہ کم از کم ایک میٹر لازمی تھا۔مراسلے کے مطابق مستقبل میں ان ہدایات کی خلاف ورزی پر متعلقہ ایئرلائن کا یو، اے اے کے لئے فلائٹ آپریشن کا لائسنس منسوخ کیا جاسکتا ہے۔